რუსეთში SimCity-ს მსგავსი თამაში გამოვა, იტყობინება „იზვესტია“ ეროვნული ტექნოლოგიური ინიციატივის პრესსამსახურზე დაყრდნობით. პროექტის გამოშვება ამ ზაფხულს იგეგმება.
სიმულატორს დონის სახელმწიფო ტექნიკური უნივერსიტეტის IT სპეციალისტები ავითარებენ. რუსულ SimCity-ში მომხმარებლებს ქალაქების აშენება და მათი მაცხოვრებლების ბედის თვალყურის დევნება შეეძლებათ.
„მოთამაშეებს სკოლებისა და უნივერსიტეტების აშენება დაევალებათ, რადგან მოქალაქეების განათლების დონე გავლენას ახდენს იმაზე, თუ რამდენად წარმატებით იმართება თავად ქალაქი“, - განმარტა პროექტის ხელმძღვანელმა ნიკიტა კუდრიავცევმა.
თამაშის მთავარი მახასიათებელი ის არის, რომ მასში არ იქნება წარმოდგენილი ლგბტქ პერსონაჟები. შემქმნელების თქმით, ასეთი პერსონაჟების არსებობა პირდაპირ გავლენას მოახდენს ვირტუალური მეტროპოლიის მოსახლეობაზე.
„ასევე ძალიან მნიშვნელოვანია ის ფაქტი, რომ თამაში ტრადიციულ ოჯახურ ღირებულებებს შეესაბამება. ჩვენ დიდი ხანია ვთხოვთ დეველოპერებს, შესთავაზონ ბავშვებს ალტერნატივა პოპულარული უცხოური თამაშებისა, რომლებიც ფსიქიკისთვის საშიშია“, - ხაზგასმით აღნიშნა რუსეთის ფედერაციის კომუნისტური პარტიის ფრაქციის ხელმძღვანელმა ნინა ოსტანინამ.
სიმულატორი Unreal Engine 5-ზე იმუშავებს. ამჟამად, თამაში ექსკლუზიურად პერსონალური კომპიუტერებისთვის მუშავდება, თუმცა მობილური ვერსიის გამოშვება შესაძლოა მოგვიანებით მოხდეს. SimCity-ის რუსული ვერსიის გამოშვება VK Play-ზე, Steam-სა და Epic Games-ზე იგეგმება.
