ტაილანდში დაკავებული ჯგუფ „ბი-2“-ის ოთხი წევრი არა რუსეთში, არამედ ისრაელში იქნება დეპორტირებული. ეს გადაწყვეტილება ისრაელის საგარეო საქმეთა სამინისტროსა და ტაილანდში ისრაელის საელჩოს ჩარევის შემდეგ მიიღეს, იტყობინება ისრაელის გამოცემა Ynet .
გამოცემა აზუსტებს, რომ ჯგუფის შვიდივე წევრი რუსეთის მოქალაქეა, ოთხს ისრაელის, ერთს ავსტრალიის და ერთს აშშ-ის მოქალაქეობა აქვს.
„პროცედურის თანახმად, ისინი უნდა იყვნენ დეპორტირებულნი იმ ქვეყანაში, რომლის პასპორტითაც ისინი ტაილანდში შევიდნენ“, - აღნიშნავს გამოცემა.
გაზეთის ცნობით, ოთხმა მუსიკოსმა უკვე შეიძინა ბილეთები ისრაელში და სამშაბათს დეპორტირებული იქნება. კიდევ ერთი წევრი ავსტრალიაში დეპორტირებული იქნება და „როგორც ჩანს, ჯგუფის შვიდი წევრიდან არცერთი რუსეთში ექსტრადირებული არ იქნება“.
Bi-2-ის მუსიკოსები ტაილანდში 24 იანვარს დააკავეს. ტურისტული პოლიციის ცნობით, მიზეზი სამუშაო ნებართვის (ანუ კონცერტის ნებართვის) არარსებობა იყო. თუმცა, ფუკეტში გამოსვლამდე ისინი უკვე გამოვიდნენ პატაიაში, სადაც სტამბოლში გამართული შოუს შემდეგ ჩავიდნენ. ფუკეტში სასამართლო მოსმენის შემდეგ, მუსიკოსები ბანგკოკში გადაიყვანეს. მათ 85 დოლარიანი ჯარიმა დააკისრეს და დეპორტაცია გაუკეთეს. რუსეთის გენერალურმა კონსულმა ფუკეტში ვლადიმერ სოსნოვმა „რია ნოვოსტისთან“ ინტერვიუში განაცხადა, რომ შვიდი მუსიკოსიდან ხუთი რუსეთის მოქალაქე იყო, ხოლო ორი ტაილანდში ისრაელის და ავსტრალიის პასპორტებით შევიდა.
