რუსეთის ეკონომიკა ამ ზაფხულს სტრუქტურული ცვლილებების რთული პერიოდის წინაშე დგას.
ეს განცხადება ცენტრალური ბანკის თავმჯდომარემ ელვირა ნაბიულინამ სახელმწიფო დუმის ფინანსური ბაზრების, ბიუჯეტისა და გადასახადების, ასევე ეკონომიკური პოლიტიკის კომიტეტების ერთობლივ სხდომაზე გამოსვლისას გააკეთა. მისი თქმით, სანქციებმა უკვე იმოქმედა რუსეთის ფინანსურ სექტორზე და მალე იმოქმედებს რეალურ სექტორზეც. მან ასევე აღნიშნა, რომ ცენტრალური ბანკი „არავითარ შემთხვევაში“ არ დააბრუნებს ინფლაციას 4%-იან სამიზნე ნიშნულამდე. ნაბიულინამ განაცხადა, რომ პერიოდი, როდესაც ეკონომიკას შეეძლო რეზერვებზე დაყრდნობა, დასრულდა და ძირითადი პრობლემები იმპორტის შეზღუდვებსა და საგარეო ვაჭრობის ლოჯისტიკასთან, და საბოლოოდ, ექსპორტის შეზღუდვებთან იქნება დაკავშირებული.
ამ ფონზე, რუსეთის პრეზიდენტი ვლადიმერ პუტინი ამტკიცებს, რომ დასავლეთის ქვეყნებმა, მისი სიტყვებით, სისტემის დესტაბილიზაცია ვერ შეძლეს:
„ბოლო დროს ეკონომიკისთვის მთავარი ნეგატიური ფაქტორი სანქციების ზეწოლა, დასავლეთის ქვეყნების მხრიდან სანქციების უახლესი რაუნდი იყო. ეკონომიკური „ბლიცკრიგის“ სტრატეგია ჩავარდა. უფრო მეტიც, სანქციებმა თავისი კვალი დატოვა მათზე, ვინც ისინი წამოიწყო, მათ შორის ინფლაციისა და უმუშევრობის ზრდამ, აშშ-სა და ევროპაში ეკონომიკური იმპულსის გაუარესებამ, ევროპელებში ცხოვრების დონის ვარდნამ და მათი დანაზოგების დევალვაციამ“, - განაცხადა ვლადიმერ პუტინმა სოციალურ-ეკონომიკურ საკითხებზე გამართულ შეხვედრაზე.
ამასობაში, ევროკომისია ანტირუსული სანქციების მეექვსე პაკეტზე მუშაობს. ამ ზომებმა შესაძლოა გავლენა მოახდინოს „სბერბანკზე“, რომელიც რუსეთის სექტორის 37%-ს შეადგენს და ნავთობის ემბარგოს მექანიზმები განიხილება.
„Bild“-თან ინტერვიუში ევროკომისიის პრეზიდენტმა ურსულა ფონ დერ ლაიენმა განაცხადა, რომ რუსეთის გაკოტრება მხოლოდ დროის საკითხია და პუტინი საკუთარ ქვეყანას და მისი ხალხის მომავალს ანადგურებს. ევროკომისიის ხელმძღვანელის თქმით, რუსეთში ექსპორტი 70%-ით შემცირდა, ხოლო ქვეყნის მშპ 11%-ით შემცირდება.
