მინსკის საქალაქო სასამართლოში დაიწყო პრეზიდენტობის ყოფილი კანდიდატის, სვეტლანა ტიხანოვსკაიას და ოპოზიციის საკოორდინაციო საბჭოს სხვა ლიდერების სასამართლო პროცესი. მათ დაუსწრებლად წაუყენეს ბრალი სისხლის სამართლის დანაშაულის ფართო სპექტრში, მათ შორის ღალატში, ექსტრემიზმსა და ეროვნული უსაფრთხოების ხელყოფაში.
თავად სვეტლანა ტიხანოვსკაია დავოსში იმყოფება. მან განაცხადა, რომ სასამართლოს არ ცნობს:
„პირველ რიგში, ვიტყოდი, რომ ამ ე.წ. სასამართლო პროცესს ჩვენს ქვეყანაში სამართლიანობასთან არაფერი აქვს საერთო. ყველა ეს სასამართლო პროცესი შურისძიებაა მათ წინააღმდეგ, ვინც ლუკაშენკოს რეჟიმს ან ომს ეწინააღმდეგება. <…> ამიტომ, ნამდვილად არაფერს კარგს არ ველი. მე ხანგრძლივ პატიმრობას მომისჯიან. მოსამართლე იმდენ წელს მომცემს, რამდენსაც გადაწყვეტს.“.
ბელორუსის პროკურატურა ოპოზიციის საკოორდინაციო საბჭოს ლიდერებს მასობრივი არეულობის დაგეგმვაში, შენობების ხელში ჩაგდებასა და ხელისუფლების არაკონსტიტუციური შეცვლის ორგანიზებაში ადანაშაულებს. ჯამში, მათ ათწლეულების განმავლობაში თავისუფლების აღკვეთა ემუქრებათ.
სასამართლო პროცესი დახურულ კარს მიღმა მიმდინარეობს და, ტიხანოვსკაიას თქმით, მას არ შეუძლია საქმის მასალების მოპოვება. გარდა ამისა, ყოფილმა საპრეზიდენტო კანდიდატმა განაცხადა, რომ მის მიერ დანიშნულ ადვოკატს არ დაუკავშირებია მისი კლიენტი და გაურკვეველია, თუ როგორ წარმოადგენს ის მის ინტერესებს.
ამავდროულად, ბელარუსის სასამართლოებში მიმდინარეობს ჟურნალისტებისა და აქტივისტების სხვა გახმაურებული სასამართლო პროცესები, მათ შორის ლუდმილა ჩეკინას და Tut.by პორტალის გენერალური დირექტორისა და მთავარი რედაქტორის, მარინა ზოლოტოვას, ასევე ვიასნას ადამიანის უფლებათა ცენტრის ლიდერების, მათ შორის ნობელის პრემიის ლაურეატის, ალეს ბიალიაცკის.
