სახელმწიფო დუმამ დაამტკიცა კანონი, რომელიც კრძალავს იმ ფილმების ჩვენებას და გავრცელებას, რომლებიც დისკრედიტაციას უწევენ ან უარყოფენ „ტრადიციულ რუსულ სულიერ და მორალურ ღირებულებებს“.
ის ცნობით , ინიციატივა მეორე და მესამე მოსმენით მიიღეს, მას 390 დეპუტატმა დაუჭირა მხარი. კანონი ძალაში 2026 წლის 1 მარტს შევა და შესაძლოა, რუსული კინოს სახე შეცვალოს — და კიდევ ბევრი რამ.
მთავარი სიახლეა იმ ფილმებისთვის დისტრიბუციის სერტიფიკატების გაცემის აკრძალვა, რომლებიც შეიცავს „ტრადიციული ღირებულებების უარყოფას ან დისკრედიტაციას“. ასეთი სერტიფიკატის გარეშე ფილმი უბრალოდ არ გამოვა. თუმცა, ახლა წესები ონლაინ პლატფორმებზეც გავრცელდება: თუ კულტურის სამინისტრო უარყოფს ან გააუქმებს სერტიფიკატს, როსკომნადზორს შეეძლება მოითხოვოს კონტენტის ამოღება.
ასევე დაწესდა ახალი დაბლოკვის მექანიზმები: თუ ფილმი უკვე განთავსებულია, მაგრამ აღმოჩენილია აკრძალული ელემენტები, კულტურის სამინისტრო თავის დასკვნებს როსკომნადზორს წარუდგენს. შემდეგ ციფრული პლატფორმა ვალდებულია 24 საათის განმავლობაში ამოიღოს მასალა.
სოციალური მედიაც ახლა კონტროლის ქვეშაა. ცვლილების თანახმად, ისინი ვალდებულნი არიან შეზღუდონ კონტენტზე წვდომა „როსკომნადზორის“ ბრძანებების საფუძველზე, თუ ამას კულტურის სამინისტროს ექსპერტის დასკვნა ადასტურებს. ეს ეხება არა მხოლოდ ფილმებს, არამედ ნებისმიერ ვიზუალურ გამოცემას.
საინტერესოა, რომ კანონპროექტი თავდაპირველად მოიცავდა სავალდებულო დისტრიბუციის სერტიფიკატებს ყველა ონლაინ კინოთეატრის კონტენტისთვის. თუმცა, ეს დებულება ამოიღეს. ამის ნაცვლად, დაბლოკვის ახალი საფუძველი შემოიღეს: ფილმში ტრადიციული ღირებულებების ცილისწამების ნიშნების არსებობა, როგორც ეს კულტურის სამინისტროს მიერ არის განსაზღვრული.
ახლა ფილმების, სერიალებისა და ცალკეული სცენების ბედს არა ბაზარი, არამედ სამინისტროს კომისია გადაწყვეტს. „არატრადიციული“ ისტორიების თეატრალური მომავალი, როგორც ჩანს, უკვე გადაწყვეტილია.
