საფრანგეთის სენატმა მიიღო სომხეთის მხარდამჭერი რეზოლუცია და აზერბაიჯანის წინააღმდეგ სანქციების დაწესება შესთავაზა. რეზოლუციამ პირველი მოსმენით ეროვნული ასამბლეის (საფრანგეთის პარლამენტი) ზედა პალატის 295 წევრის მხარდაჭერა მიიღო, ერთი სენატორის წინააღმდეგ კი ხმა მისცა.
რეზოლუციაში, კერძოდ, სენატი მოითხოვს „აზერბაიჯანის შეიარაღებული ძალების გაყვანას სომხეთის სუვერენული ტერიტორიიდან და პატივისცემას სომხეთის ტერიტორიული მთლიანობისა და სუვერენიტეტის მიმართ“.
რეზოლუცია მოუწოდებს ყველა სომეხი სამხედრო ტყვეს გათავისუფლებას და მათ სამშობლოში რეპატრიაციას და სთავაზობს საფრანგეთის მთავრობას (ევროპელ პარტნიორებთან თანამშრომლობით) აზერბაიჯანის აგრესიის სასჯელად დიპლომატიური და ეკონომიკური ზომების მიღებას, მათ შორის აზერბაიჯანის ხელისუფლების აქტივების წინააღმდეგ სანქციების გამოყენებას, ასევე აზერბაიჯანიდან გაზისა და ნავთობის იმპორტზე ემბარგოს დაწესებას.
დოკუმენტი ადასტურებს მთიანი ყარაბაღის რესპუბლიკის აღიარების აუცილებლობას და სთავაზობს მთავრობას მთიან ყარაბაღში ჰუმანიტარული ოფისის შექმნას, ასევე რეკომენდაციას აძლევს საფრანგეთის კაბინეტს, განიხილოს „სომხეთის თავდაცვისუნარიანობის გაძლიერების მხარდაჭერის შესაძლებლობა“.
საფრანგეთის სენატის რეზოლუცია ასევე შეიცავს პუნქტს, რომელიც მოუწოდებს პრეზიდენტ ემანუელ მაკრონის მთავრობას, დაუყოვნებლივ მიიღოს ზომები სომეხი მოსახლეობისა და სომხეთის უსაფრთხოების უზრუნველსაყოფად მის საერთაშორისოდ აღიარებულ საზღვრებში და დაიწყოს „საერთაშორისო საზოგადოების ეგიდით ინტერპოზიციური ძალების განლაგება“. აქამდე რუსეთი რჩებოდა ერთადერთ საერთაშორისო არბიტრად აზერბაიჯანსა და სომხეთს შორის მთიანი ყარაბაღის ტერიტორიაზე მიმდინარე კონფლიქტში (რეგიონში სამხედრო ყოფნით).
სენატის გადაწყვეტილებას მხარი დაუჭირა საფრანგეთში სომხური ორგანიზაციების საკოორდინაციო საბჭომ (CCAF), რომელმაც პარიზში, სენატის შენობის წინ სოლიდარობის მცირე დემონსტრაცია მოაწყო. 15 ნოემბრის დილით, რეზოლუციის მიღების დღეს, სენატის შენობის წინ აზერბაიჯანელი მომიტინგეების ჯგუფიც შეიკრიბა და საფრანგეთს აზერბაიჯან-სომხეთის ურთიერთობებში ნეიტრალიტეტის დაცვისკენ მოუწოდეს.
