სამხრეთ აფრიკის ერთ-ერთი მედიასაშუალება იუწყება, რომ სამხრეთ აფრიკის ხელისუფლებას სურს, ვლადიმერ პუტინის BRICS-ის სამიტში მონაწილეობა ვიდეოკავშირის საშუალებით მოაწყოს, სისხლის სამართლის საერთაშორისო სასამართლოს ორდერის გამო.
სამხრეთ აფრიკული გამოცემა „სანდეი თაიმსი“, წყაროებზე დაყრდნობით, იუწყება, რომ სამხრეთ აფრიკის ხელისუფლება მოლაპარაკებებს აწარმოებს რუსეთის ოფიციალურ პირებთან, რათა შეიმუშაონ უსაფრთხო ფორმატი რუსეთის პრეზიდენტ ვლადიმერ პუტინის BRICS-ის სამიტში მონაწილეობისთვის, რომელიც აგვისტოში დურბანში გაიმართება.
გამოცემა აცხადებს, რომ სამიტის მასპინძელი რამდენიმე მოწვეული სტუმრის, მათ შორის პუტინის, ვიდეოკავშირის საშუალებით მონაწილეობის ორგანიზებას სთავაზობს. ამტკიცებენ, რომ რუსეთის პრეზიდენტის ფორმატის შეცვლის მიზეზი სისხლის სამართლის საერთაშორისო სასამართლოს ბრძანება იყო, რომლის იურისდიქციასაც სამხრეთ აფრიკა აღიარებს, რომის სტატუტის რატიფიცირების შემდეგ. გამოცემა აღნიშნავს, რომ თუ პუტინი სამხრეთ აფრიკაში პირადად გამოცხადდება, ადგილობრივი ხელისუფლება ვალდებული იქნება დააკავოს იგი.
როგორც „კომერსანტი“ აღნიშნავს, სამხრეთ აფრიკის საგარეო საქმეთა მინისტრმა ნალედი პანდორმა მარტის ბოლოს განაცხადა, რომ სამხრეთ აფრიკა პუტინის ვიზიტთან დაკავშირებით კონსულტაციებს ატარებდა. აპრილის დასაწყისში „რია ნოვოსტიმ“ სამხრეთ აფრიკის BRICS-ის შერპას, ანილ სუკლალის ციტირება მოახდინა, რომელმაც განაცხადა, რომ სამიტს ყველა ლიდერი პირადად დაესწრებოდა. აპრილის ბოლოს კრემლის პრესმდივანმა დიმიტრი პესკოვმა განაცხადა, რომ პუტინმა სამიტში მონაწილეობის მოწვევა მიიღო, თუმცა „მონაწილეობის ფორმატთან დაკავშირებით გადაწყვეტილებები ღონისძიებასთან ახლოს იქნება მიღებული“.
