შაბათს, 5 დეკემბერს, ჩრდილოეთ გერმანიის ქალაქ ბრემენის პოლიციამ შეაჩერა კორონავირუსის პანდემიის გამო დაწესებული შეზღუდვების წინააღმდეგ გამართული საპროტესტო აქცია, რომელიც გერმანიის უმაღლესი სასამართლოს, ფედერალური საკონსტიტუციო სასამართლოს გადაწყვეტილების მიუხედავად გაგრძელდა.
ასობით ადამიანი დღისა და საღამოს განმავლობაში განაგრძობდა ცენტრალური რკინიგზის სადგურის მახლობლად შეკრებას. მომიტინგეებს შორის იყვნენ შეზღუდვების მოწინააღმდეგეები, ასევე კონტრდემონსტრანტები. პოლიციის ცნობით, დემონსტრაციის დაშლისას ორი ოფიცერი დაშავდა.
შაბათს, გერმანიის ფედერალურმა საკონსტიტუციო სასამართლომ აკრძალვა დაამტკიცა Querdenker მოძრაობის მიერ ორგანიზებული საპროტესტო აქციის ჩატარებაზე. ორგანიზატორებმა საგანგებო საჩივარი შეიტანეს კარლსრუეს სასამართლოში, რათა საპროტესტო აქციის ჩატარება 20 000-მდე მონაწილის მონაწილეობით მომხდარიყო.
ბრემენის ქალაქის მთავრობამ პროტესტი აკრძალა იმ მოტივით, რომ ორგანიზატორები და მონაწილეები არ დაიცავდნენ ფიზიკური დისტანცირების წესებს და არ ატარებდნენ პირბადეებს, როგორც ეს სხვა ქალაქებში გამართული პროტესტების დროს იყო.
„იმის გათვალისწინებით, თუ რამდენი ადამიანი ზღუდავს სოციალურ კონტაქტებს სოლიდარობის მიზნით და იცავს დისტანცირებისა და ჰიგიენის წესებს, ჩვენ არანაირად არ შეგვიძლია შევეგუოთ იმ ფაქტს, რომ ისინი, ვინც უარს ამბობენ პირბადის ტარებაზე, განზრახ უქმნიან საფრთხეს სხვების ჯანმრთელობას თავიანთი ქცევით“, - განაცხადა ბრემენის შინაგან საქმეთა მინისტრმა ულრიხ მაურერმა.
ორმა სასამართლომ, ბრემენის ადმინისტრაციულმა სასამართლომ და უზენაესმა ადმინისტრაციულმა სასამართლომ, აკრძალვა გერმანიის უზენაესი სასამართლოს გადაწყვეტილების მიღებამდეც კი ძალაში დატოვეს და დაასაბუთეს, რომ მასობრივმა დემონსტრაციამ შეიძლება „ინფექციის მნიშვნელოვანი რისკი“ შექმნას.
გასულ კვირას კანცლერმა ანგელა მერკელმა გამოაცხადა, რომ 2 ნოემბრიდან ძალაში მყოფი ნაწილობრივი ლოქდაუნი 2 იანვრამდე გახანგრძლივდებოდა, რადგან ქვეყანამ ვერ შეძლო კორონავირუსის ინფექციების შემცირების მიზნების შესრულება. არსებობს შეშფოთება, რომ ჯანდაცვის სისტემის შესაძლებლობები შესაძლოა ზღვრამდე გაიზარდოს.
ბოლოდროინდელმა გამოკითხვამ აჩვენა, რომ გერმანელების 53% მიიჩნევს, რომ ლოკდაუნის ზომები მიზანშეწონილია, ხოლო დაახლოებით 18% თვლის, რომ კიდევ უფრო მკაცრი შეზღუდვები უნდა იქნას გამოყენებული.
მიუხედავად იმისა, რომ Querdenker-ის მოძრაობა გერმანული საზოგადოების მცირე ნაწილს წარმოადგენს, მათ ზაფხულიდან მოყოლებული პანდემიის გამო დაწესებული შემზღუდავი ზომების წინააღმდეგ მრავალი საპროტესტო აქცია მოაწყვეს.
