უკრაინის საგარეო საქმეთა სამინისტრომ მომხმარებელი ქვეყნები გააფრთხილა, რომ რუსეთის მიერ გაყიდული მარცვლეულის ტვირთები შესაძლოა ნაწილობრივ ან მთლიანად შეიცავდეს მოპარულ უკრაინულ მარცვლეულს.
„ჩვენ გვჯერა, რომ ნებისმიერი ქვეყანა, რომელიც შეგნებულად ყიდულობს მოპარულ მარცვლეულს, ამ დანაშაულის თანამონაწილეა“, - განაცხადა საგარეო საქმეთა სამინისტრომ.
უკრაინის მთავრობის ცნობით, ოკუპანტებმა უკვე მოიპარეს სულ მცირე 400,000–500,000 ტონა მარცვლეული, რომლის ღირებულება 100 მილიონ დოლარს აღემატება. სევასტოპოლიდან გამოსული თითქმის ყველა გემი, რომელიც მარცვლეულს დატვირთავს, მოპარულ უკრაინულ საქონელს გადაიტანს.
რუსეთის მიერ უკრაინული მარცვლეულის ქურდობა დასტურდება უკრაინელი ფერმერების მრავალი ჩვენებითა და დოკუმენტური მტკიცებულებებით.
„უკრაინის საგარეო საქმეთა სამინისტრო კატეგორიულად გმობს რუსეთის ქმედებებს უკრაინელი ფერმერებისგან უკანონოდ ჩამორთმეული მარცვლეულის განკარგვასთან დაკავშირებით. რუსი ოკუპანტები უკრაინულ მარცვლეულს კონფისკაციას უკეთებენ, იყენებენ მას საკუთარი მოხმარებისთვის ან ცდილობენ მის საერთაშორისო ბაზრებზე გაყიდვას“, - აღნიშნა სამინისტრომ.
შეგახსენებთ, რომ უკრაინის თავდაცვის სამინისტროს მთავარი სადაზვერვო დირექტორატი აცხადებს, რომ ოკუპანტები უკრაინიდან მოპარულ მარცვლეულს სირიაში გადააქვთ.
მანამდე, უკრაინის პრეზიდენტმა ვოლოდიმირ ზელენსკიმ განაცხადა, რომ ზოგიერთ ქვეყანას სურს რუსეთიდან შეიძინოს უკრაინიდან მოპარული მარცვლეული.
