უნგრეთის პრემიერ-მინისტრმა ვიქტორ ორბანმა 23 მაისს საგანგებო მდგომარეობის გამოცხადების შემდეგ პირველი დადგენილება გამოაცხადა: მსხვილი კომპანიები ვალდებულნი იქნებიან, ზედმეტი მოგება ეროვნულ ბიუჯეტში გადარიცხონ. ამის შესახებ Bloomberg-ი უნგრეთის პრემიერ-მინისტრის ვიდეომიმართვაზე დაყრდნობით იტყობინება.
დადგენილების თანახმად, საბანკო, ენერგეტიკის, ტელეკომუნიკაციებისა და ავიაციის სექტორის კომპანიებმა, ასევე მსხვილმა საცალო ქსელებმა, ორი წლის განმავლობაში თავიანთი მოგების ნაწილი ორ სპეციალურად შექმნილ ფონდში უნდა გადარიცხონ.
ამ თანხებიდან მიღებული თანხა მოქალაქეების კომუნალური გადასახადების სუბსიდირებას, ასევე უნგრეთის არმიის მოდერნიზაციის დაფინანსებას მოხმარდება.
„ჩვენ ვთხოვთ და ველოდებით, რომ ისინი, ვინც ომის ამ პერიოდში დამატებითი შემოსავალი მიიღო, დაეხმარებიან ხალხს და წვლილს შეიტანენ ეროვნული თავდაცვის ბიუჯეტში“, - განაცხადა ორბანმა ვიდეომიმართვაში.
ორბანი მიიჩნევს, რომ მოგების „ექსპროპრიაცია“ ხელს შეუწყობს სახელმწიფო ბიუჯეტის დაბალანსებას, რომელსაც ევროკავშირის ფონდებიდან დამატებითი ასიგნებები მოკლებული აქვს. სააგენტო განმარტავს, რომ სახელმწიფო ბიუჯეტის ხარჯების მნიშვნელოვანი ნაწილი ორბანის პარტიამ 3 აპრილის არჩევნებში გამარჯვებისთვის გამოიყენა.
ორბანის დამაჯერებელი გამარჯვებიდან რამდენიმე დღეში, ევროკომისიამ ახლადშექმნილი მექანიზმი აამოქმედა, რომელიც მას საშუალებას აძლევს, შეამციროს დაფინანსება იმ წევრი სახელმწიფოებისთვის, რომლებსაც კორუფცია და კანონის უზენაესობასთან დაკავშირებული პრობლემები აქვთ.
