რუსეთი მოლდოვას მიერ კიშინიოვში რუსეთის საელჩოს თანამშრომლის პერსონა ნონ გრატად გამოცხადებას უპასუხებს, იტყობინება „რია ნოვოსტი“ რუსეთის საგარეო საქმეთა სამინისტროს მითითებით.
„როგორც რუსულმა მხარემ ადრე განაცხადა, რუსეთი შესაბამის რეაგირებას მოახდენს“, - განაცხადა რუსეთის სამინისტრომ.
დღეს მოლდოვას საგარეო საქმეთა და ევროპული ინტეგრაციის სამინისტრომ გამოაცხადა კიშინიოვში რუსეთის საელჩოს თანამშრომლის გაძევების შესახებ. ამის შესახებ უკვე ეცნობა მოლდოვაში რუსეთის ელჩს ოლეგ ვასნეცოვს.
საგარეო საქმეთა და ევროპული ინტეგრაციის სამინისტრომ აღნიშნა, რომ მეზობელი ქვეყნის ინფრასტრუქტურაზე სარაკეტო დარტყმები საფრთხეს უქმნის მოლდოვას ენერგეტიკულ უსაფრთხოებას.
დღეს დილით, უკრაინის საჰაერო თავდაცვის სისტემის მიერ ჩამოგდებული რაკეტის ფრაგმენტები უკრაინის საზღვართან მდებარე მოლდოვური სოფლის, ნასლავცეას ჩრდილოეთ ნაწილში დაეცა. დაშავებულები არ არიან, თუმცა რამდენიმე სახლის ფანჯრები ჩაიმსხვრა.
თავდაცვის სამინისტრომ აღნიშნა, რომ მათ მოლდოვას საჰაერო სივრცის დარღვევა არ დააფიქსირეს. მოლდოვას ტერიტორიაზე მხოლოდ უკრაინის საჰაერო თავდაცვის მიერ ჩამოგდებული რაკეტის ფრაგმენტები დაეცა.
