რუსეთის მიერ უკრაინის ტერიტორიაზე განხორციელებული განურჩეველი თავდასხმები აკრძალულია საერთაშორისო ჰუმანიტარული სამართლით და შესაძლოა, ომის დანაშაულად ჩაითვალოს.
როგორც გაეროს ადამიანის უფლებათა უმაღლესმა კომისარმა მიშელ ბაჩელეტმა ჟენევაში გაეროს საბჭოს სხდომაზე განაცხადა, ამჟამად რუსეთის მიერ კასეტური საბრძოლო მასალის გამოყენების 24 შემთხვევა გამოძიების პროცესშია. მისი თქმით, უკრაინის ქალაქებში საავადმყოფოები, წყალმომარაგების სისტემები და ადმინისტრაციული შენობები დაზიანდა ჭურვებისა და სარაკეტო დარტყმების შედეგად.
„სამოქალაქო ობიექტების ფართომასშტაბიანი განადგურება და მშვიდობიან მოსახლეობაში მსხვერპლის დიდი რაოდენობა ნათლად აჩვენებს, რომ განსხვავების, პროპორციულობისა და სიფრთხილის ფუნდამენტური პრინციპები საკმარისად არ იყო დაცული“, - თქვა მან.
ბაჩელეტმა დასძინა, რომ უკრაინელი ხალხი რუსული დაბომბვის შედეგად გამოწვეულ „ნამდვილ კოშმარს“ განიცდის. უმაღლესმა კომისარმა მოსკოვს მოუწოდა, დაუყოვნებლივ შეწყვიტოს საომარი მოქმედებები და გაიყვანოს ჯარები უკრაინის ტერიტორიიდან.
„მოვუწოდებ რუსეთის ფედერაციას, გაითვალისწინოს გენერალური ასამბლეისა და ამ საბჭოს მკაფიო და მკაცრი მოწოდებები და დაუყოვნებლივ მიიღოს ზომები უკრაინის ტერიტორიიდან თავისი ჯარების გასაყვანად“, - განაცხადა მან.
