რუსეთი გამოდის იაპონიასთან სამშვიდობო ხელშეკრულებისა და სამხრეთ კურილის კუნძულებზე ერთობლივი ეკონომიკური საქმიანობის დამყარების შესახებ მოლაპარაკებებიდან და ასევე აუქმებს იაპონიის მოქალაქეებისთვის კუნძულებზე უვიზო მიმოსვლას. ამის შესახებ რუსეთის საგარეო საქმეთა სამინისტროს პრესსამსახურმა განაცხადა.
მათ განმარტეს, რომ გადაწყვეტილება მიღებული იქნა „იაპონიის მიერ რუსეთის წინააღმდეგ დაწესებული ცალმხრივი შეზღუდვების აშკარა არამეგობრული ხასიათის გათვალისწინებით“.
რუსული მხარე ასევე ბლოკავს იაპონიის, როგორც შავი ზღვის ეკონომიკური თანამშრომლობის ორგანიზაციის პარტნიორის სტატუსის გაგრძელებას სექტორული დიალოგისთვის.
იაპონია აცხადებს, რომ საბჭოთა კავშირმა უკანონოდ მიიტაცა ოთხი კუნძული - კუნაშირი, იტურუპი, შიკოტანი და ჰაბომაის ჯგუფი - 1945 წლის აგვისტოში, იაპონიის კაპიტულაციის შემდეგ.
2018 წელს იაპონიის მაშინდელ პრემიერ-მინისტრ შინზო აბესა და რუსეთის პრეზიდენტ ვლადიმერ პუტინს შორის გამართული სამიტის დროს ორმა ქვეყანამ დაადასტურა, რომ ისინი 1956 წლის ერთობლივი დეკლარაციის საფუძველზე სამშვიდობო ხელშეკრულებაზე მოლაპარაკებებს გამართავდნენ, რომელშიც ნათქვამი იყო, რომ სამშვიდობო ხელშეკრულების დადების შემდეგ ორი პატარა კუნძული - შიკოტანი და ჰაბომაის კუნძულების ჯგუფი - იაპონიას გადაეცემოდა.
თუმცა, 2020 წლის ივლისში ძალაში შევიდა რუსეთის კონსტიტუციაში შეტანილი ცვლილებები, რომელთა თანახმად, მოსკოვს ეკრძალება თავისი ტერიტორიის ნებისმიერი ნაწილის გადაცემა.
იაპონური საინფორმაციო სააგენტო Kiodo News-ის ცნობით, ეს მოვლენა ნიშნავს, რომ რუსეთი, სავარაუდოდ, სადავო კუნძულებთან დაკავშირებით იაპონიასთან კომპრომისზე წავა.
24 თებერვალს რუსეთის უკრაინაში შეჭრის შემდეგ, იაპონიამ G7-ის სხვა ინდუსტრიულ ქვეყნებთან ერთად მოსკოვისთვის მკაცრი ეკონომიკური სანქციები დააწესა.
