ნიუ-იორკში აუქციონზე პირველად გაიყიდა ჰუმანოიდი რობოტის მიერ შექმნილი ნახატი. ეს არის ინგლისელი მათემატიკოსის ალან ტურინგის პორტრეტი, სახელწოდებით „ხელოვნური ინტელექტის ღმერთი“.
„ალან ტურინგის პორტრეტი“ Sotheby's-ში 1.32 მილიონ დოლარად გაიყიდა, იტყობინება აუქციონის სახლზე დაყრდნობით. ნახატმა მნიშვნელოვნად გადააჭარბა მის სავარაუდო ფასს, რომელიც 120 000-დან 180 000 დოლარამდე იყო და 27 შეთავაზება მიიღო.
ნახატი რობოტ-მხატვარმა აი-დამ შექმნა, რომელიც ორი წლის განმავლობაში პროგრამისტების, ინჟინრებისა და ხელოვნების სპეციალისტების გუნდმა შეიმუშავა. ადა ლავლეისის პატივსაცემად დასახელებული აი-და ერთ-ერთ ყველაზე მოწინავე ჰუმანოიდ რობოტად ითვლება და იდეების გენერირება სტუდიასთან დიალოგის საშუალებით შეუძლია. ტურინგის პორტრეტის იდეა ხელოვნური ინტელექტის როლის შესახებ დისკუსიის დროს გაჩნდა და რობოტმა დამოუკიდებლად აირჩია სტილი, ფერი და ტექსტურა, ტურინგის ფოტოს საფუძველზე შექმნა გამოსახულება.
აუქციონზე წარდგენილი ინფორმაცია ხაზს უსვამს ამ მოვლენის მნიშვნელობას, რომელიც, როგორც Sotheby's-მა აღნიშნა, სიმბოლურად გამოხატავს ხელოვნურ ინტელექტსა და გლობალურ ხელოვნების ბაზარს შორის ურთიერთქმედების ახალ ეტაპს. სხვათა შორის, ტურინგი იყო ერთ-ერთი პირველი მეცნიერი, რომელმაც 1950-იან წლებში კითხვები გააჩინა ხელოვნური ინტელექტის შესაძლებლობებთან დაკავშირებით, რამაც კიდევ უფრო მეტი სიმბოლიზმი შესძინა ამ რობოტის მიერ შექმნილ პორტრეტს.
