ჩეჩნეთის ფიზიკური კულტურის, სპორტისა და ახალგაზრდული პოლიტიკის მინისტრის პირველ მოადგილედ დაინიშნა 18 წლის ახმატ კადიროვი, რეგიონის გუბერნატორის რამზან კადიროვის უფროსი ვაჟი. ამის შესახებ რეგიონის პარლამენტის სპიკერმა მაგომედ დაუდოვმა Telegram-ზე განაცხადა.
„დარწმუნებული ვარ, რომ მისი ამ მნიშვნელოვან თანამდებობაზე დანიშვნა ხელს შეუწყობს სამინისტროს მუშაობის დონისა და ხარისხის ამაღლებას სპორტის განვითარებაში, ახალგაზრდული პოლიტიკის განხორციელებაში, ასევე ახალგაზრდა თაობის პატრიოტულ და სულიერ-ზნეობრივ აღზრდაში“, - ნათქვამია დაუდოვის განცხადებაში.
ჩეჩნეთის პარლამენტის ხელმძღვანელმა აღნიშნა, რომ ახმატ კადიროვი თავად სპორტსმენია.
„მან ერთზე მეტი შერეული საბრძოლო ხელოვნებისა და კრივის ტურნირი მოიგო. ჩემი ძვირფასი ძმისშვილი ძალიან მგრძნობიარეა ახალგაზრდებთან დაკავშირებული საკითხების მიმართ“, - აღნიშნა მან.
დაუდოვმა ასევე გამოთქვა რწმენა, რომ კადიროვი უმცროსი „მაღალ დონეზე გაართმევს თავს მასზე დაკისრებულ ამოცანებს“.
ახმატ კადიროვი 2005 წლის 8 ნოემბერს დაიბადა. ის ჩეჩნეთის მეთაურის თანაშემწე და ბავშვთა და ახალგაზრდული მოძრაობის „პირველების მოძრაობა“ რეგიონული განყოფილების თავმჯდომარეა. მარტში რამზან კადიროვმა თავისი ვაჟის, ახმატისა და ვლადიმერ პუტინის შეხვედრის შესახებ განაცხადა. შეხვედრა, როგორც ჩეჩნეთის მეთაურმა აღნიშნა, არაფორმალური იყო. ახმატმა პრეზიდენტს რესპუბლიკის ახალგაზრდული პოლიტიკის შესახებ ინფორმაცია მიაწოდა.
