პუტინმა ასევე განაცხადა, რომ სანქტ-პეტერბურგში, ვაგნერის ოფისში 10 მილიარდი რუბლი ნაღდი ფული და 5 კგ კოკაინი იპოვეს.
რუსეთის პრეზიდენტმა ვლადიმერ პუტინმა განაცხადა, რომ „ვაგნერ პმკ“-ის დამფუძნებლის, ევგენი პრიგოჟინის ცხედარში, ასევე მასთან ერთად დაღუპული სხვა ადამიანების ცხედრებში ხელყუმბარების ფრაგმენტები იპოვეს ტვერის რეგიონში მომხდარი ავიაკატასტროფის დროს. ეს განცხადება მან „ვალდაის“ სადისკუსიო კლუბის შეხვედრაზე გააკეთა.
„ჩვენ ვიცით თვითმფრინავის ჩამოვარდნის შესახებ. საგამოძიებო კომიტეტის ხელმძღვანელმა ცოტა ხნის წინ მომაწოდა ინფორმაცია, რომ მსხვერპლთა ცხედრებში ხელყუმბარების ფრაგმენტები აღმოაჩინეს. თვითმფრინავზე გარეგანი ზემოქმედება არ ყოფილა“, - განაცხადა რუსეთის პრეზიდენტმა ვლადიმერ პუტინმა. მან ასევე თქვა, რომ ალკოჰოლისა და ნარკოტიკების ტესტი არ ჩატარებულა და დასძინა, რომ FSB-მ სანქტ-პეტერბურგის ოფისში 10 მილიარდი რუბლი ნაღდი ფული და ხუთი კილოგრამი კოკაინი აღმოაჩინა.
აშშ-ის დაზვერვის წინასწარი შეფასებით, თვითმფრინავის ჩამოვარდნა, რომლის შედეგადაც ვაგნერის PMC-ის ხელმძღვანელი დაიღუპა, განზრახ აფეთქების შედეგი იყო.
შერემეტიევოდან სანქტ-პეტერბურგში მიმავალმა Embraer Legacy 600-ის ტიპის თვითმფრინავმა ვაგნერის ჯგუფის ამბოხებიდან ორი თვის შემდეგ ტვერის რეგიონში კატასტროფა განიცადა. ათი ადამიანი დაიღუპა.
მანამდე კრემლმა უარყო რაიმე კავშირი ევგენი პრიგოჟინისა და „ვაგნერის ჯგუფის“ სხვა წევრების გარდაცვალებასთან, რომლებიც ტვერის რეგიონში ჩამოვარდა. ვლადიმერ პუტინის პრესმდივანმა, დიმიტრი პესკოვმა, ასეთ ცნობებს „აბსოლუტური ტყუილი“ და „სპეკულაცია“ უწოდა.
