პოლონეთი გააგრძელებს წამყვანი როლის შესრულებას უკრაინის სამხედრო მხარდაჭერაში, მათ შორის, საჭირო ტანკების გაგზავნაში. ამის შესახებ პოლონეთის პრეზიდენტმა ანდჟეი დუდამ შვეიცარიის ქალაქ დავოსში, მსოფლიო ეკონომიკურ ფორუმზე, Euronews-თან ინტერვიუში განაცხადა.
იქ მან მონაწილეობა მიიღო ევროპასა და მსოფლიოში უსაფრთხოების საკითხებზე გამართულ რამდენიმე დისკუსიაში და დაესწრო უკრაინის სახლში რუსეთის მიერ უკრაინაში ჩადენილი ომის დანაშაულებებისადმი მიძღვნილ გამოფენის გახსნას.
ანდჟეი დუდა, პოლონეთის პრეზიდენტი: „ახლა ჩვენ ჩვენი ქვედანაყოფებიდან „ლეოპარდის“ ტანკებს უკრაინაში გადავიტანთ, რა თქმა უნდა, ჩვენი არმიის მოდერნიზებით და ჩვენივე უსაფრთხოების უზრუნველყოფით, რადგან გვესმის, რომ ეს ჩვენი, როგორც პოლონეთის ხელისუფლების, პასუხისმგებლობაა“.
დავოსში პოლონეთმა კვლავ მოუწოდა დასავლელ პარტნიორებს, გაზარდონ უკრაინისთვის სამხედრო მხარდაჭერა.
ანდჟეი დუდა: „ჩვენ ვრცლად ვისაუბრეთ პოლონეთის ინიციატივაზე, რომელიც უკრაინაში „ლეოპარდის“ ტიპის ტანკების გაგზავნას ეხება, რათა სხვადასხვა ქვეყნის მოკავშირე ძალების დახმარებით შევძლოთ ამ „ლეოპარდის“ ტიპის ტანკების აწყობა და უკრაინისთვის სულ მცირე ჯავშანტექნიკის ბრიგადის შექმნა. ამიტომ, დიდი ბრიტანეთის განცხადება „ჩელენჯერ 2“-ის ტანკებთან დაკავშირებით ასევე მნიშვნელოვანია“.
