მადრიდში დაგეგმილ ნატოს სამიტზე პოლონეთი უკრაინაში რუსეთის შეჭრის შემდეგ ქვეყანაში ჩრდილოატლანტიკური ალიანსის ყოფნის გაზრდას დაუჭერს მხარს.
ამის შესახებ პოლონეთის თავდაცვის მინისტრმა მარიუშ ბლაშჩაკმა polskatimes.pl-თან ინტერვიუში ისაუბრა, იუწყება European Pravda.
ბლაშჩაკმა განაცხადა, რომ მადრიდში დაგეგმილი ნატოს სამიტი „განსაკუთრებული მნიშვნელობის იქნება, რადგან უკრაინის წინააღმდეგ რუსეთის აგრესიამ საბოლოოდ შეცვალა გლობალური უსაფრთხოების სისტემა“.
მისი თქმით, 2016 წელს ვარშავაში გამართულმა ნატოს სამიტმა პოლონეთსა და რეგიონში მოკავშირე ძალების მონაწილეობით ბატალიონების საბრძოლო ჯგუფების შექმნა გამოიწვია. პოლონეთი ამჟამად მადრიდში ისეთი გადაწყვეტილებების მიღებას უჭერს მხარს, რომლებიც კიდევ უფრო გააძლიერებს მათ პოტენციალს, როგორც ნატოს აღმოსავლეთ ფლანგისთვის შემაკავებელი და თავდაცვითი ელემენტის.
„ჩვენ ვეძებთ მეტ ჯარისკაცს და გვსურს, საფრთხის შემთხვევაში გავზარდოთ მოკავშირე ძალების მზადყოფნა. ვადასტურებ, რომ ვცდილობთ პოლონეთში ნატოს სტრუქტურების ფარგლებში ბრიგადის ჯგუფის განლაგებას“, - განაცხადა პოლონეთის ვიცე-პრემიერმა და ეროვნული თავდაცვის მინისტრმა.
„ჩვენ უკვე რამდენიმე წელია, რაც პოლონეთის მიწაზე ამერიკელ ჯარისკაცებს ვმასპინძლობთ და მათი რიცხვი იზრდება და ამ მუდმივი ყოფნის შენარჩუნება ჩემი ერთ-ერთი პრიორიტეტია“, - დასძინა ვიცე-პრემიერმა.
ნატოს სამიტი მადრიდში 28-30 ივნისს გაიმართება.
ალიანსის სამიტამდე მისმა წევრებმა აღმოსავლეთ ფლანგის დაცვის ახალ მოდელზე უნდა შეთანხმდნენ, რაც რუსეთის მიერ უკრაინაში სრულმასშტაბიანი შეჭრის აუცილებლობამ გამოიწვია.
