უკრაინაში ცეცხლის შეწყვეტის შემდეგაც კი, რუსეთი კონტინენტზე მშვიდობისთვის საფრთხედ დარჩება. ეს მოსაზრება პოლონეთის საგარეო საქმეთა მინისტრმა ზბიგნევ რაუმ გერმანელ კოლეგასთან შეხვედრაზე გამოთქვა.
პოლონეთის საგარეო საქმეთა მინისტრი არ თვლის, რომ უკრაინაში ცეცხლის შეწყვეტის შემდეგ რუსეთი მყისიერად მშვიდობიან სახელმწიფოდ გარდაიქმნება. დიპლომატმა აღიარა, რომ მას ეშინია რუსეთის შეჭრის პოლონეთში ან ნატოს აღმოსავლეთ ფლანგზე მდებარე სხვა ქვეყანაში.
„ის იდეა, რომ რუსეთი ცეცხლის შეწყვეტაზე დათანხმებისთანავე შეიცვლება, აუხდენელი ოცნებაა. ის ევროპაში მშვიდობისთვის საფრთხედ დარჩება“, - განაცხადა რაუმ.
ევროპული უსაფრთხოების მიზნით, პოლონეთი და გერმანია, მინისტრის თქმით, ვალდებულნი არიან, ძალისხმევა არ დაიშურონ რუსეთის „სტრატეგიული დამარცხების“ მისაღწევად. ეს გულისხმობს უკრაინის მიერ საერთაშორისოდ აღიარებულ ყველა ტერიტორიაზე კონტროლის აღდგენას.
მანამდე, პრეზიდენტმა ზელენსკიმ განაცხადა, რომ 24 თებერვლის შემდეგ ჩამორთმეული ტერიტორიების განთავისუფლება რუსეთთან მოლაპარაკებების განახლების პირობა იყო. მისი აზრით, საბოლოო შეთანხმებაზე ორივე პრეზიდენტი უნდა შეთანხმდეს.
სხვათა შორის, პოლონეთის პრეზიდენტმა დუდამ გამორიცხა დასავლეთის ზეწოლის წარმატება კიევზე, რათა რუსეთთან დათმობებზე წასულიყო.
