ცხოველთა უფლებების დამცველი ორგანიზაციის გერმანული ფილიალი მიიჩნევს, რომ ტოქსიკური მამაკაცურობის წარმომადგენლების წინააღმდეგ „სექს-გაფიცვის“ გამოცხადება პლანეტას კლიმატური კრიზისისგან გადაარჩენს.
PETA-ს გერმანიის წარმომადგენლები ქალებს მოუწოდებენ „სექს-გაფიცვისკენ, რათა სამყარო გადაარჩინონ“, - იტყობინება Daily Mail Bild-ზე დაყრდნობით. თავიანთ მიმართვაში აქტივისტები გასულ წელს სამეცნიერო ჟურნალ PLOS One-ში გამოქვეყნებულ კვლევას ციტირებენ, რომლის თანახმადაც, მამაკაცები კვების ჩვევების გამო 41%-ით მეტ სათბურის გაზებს გამოყოფენ, ვიდრე ქალები. კვლევის ავტორებმა დაადგინეს, რომ საკვებთან დაკავშირებული სათბურის გაზების 57% ხორცისა და რძის პროდუქტებიდან მოდის.
„ვინ არ იცნობს იმ გარეუბნელ მამებს, რომლებიც ლუდის ბოთლებსა და მწვადის მაშებს იყენებენ?“ - განაცხადა Peta Germany-ის აღმასრულებელმა დირექტორმა, დენიელ კოქსმა. „ის ფაქტი, რომ გერმანელი „გრილის ოსტატები“ თავიანთ მამაკაცურობას ხორცის ჭამით ამტკიცებენ, არა მხოლოდ ცხოველებისთვისაა საზიანო. ახლა უკვე არსებობს სამეცნიერო მტკიცებულება, რომ ტოქსიკური მამაკაცურობა კლიმატსაც აზიანებს“. სექსისა და რეპროდუქციის აკრძალვის გარდა, Peta Germany მამაკაცებისთვის ხორცზე 41%-იანი გადასახადის დაწესებას გვთავაზობს.
ამ მოწოდებებმა აღშფოთება გამოიწვია გერმანიაში, ქვეყანაში, რომელიც ცნობილია ძეხვეულისა და შნიცელის სიყვარულით, ხოლო Bild-მა, რომელმაც სტატია პირველ გვერდზე გამოაქვეყნა, მას „გიჟური წინადადება“ უწოდა. თუმცა, გერმანელი აქტივისტების ირონიულ კამპანიაში არის სიმართლის მარცვალი. მეცხოველეობა ხელს უწყობს გლობალურ დათბობას მეთანის, აზოტის ოქსიდისა და ნახშირბადის გამოყოფის გზით. სტენფორდის უნივერსიტეტის მკვლევარების მიერ წელს ჩატარებულმა კვლევამ აჩვენა, რომ ხორცის წარმოების სრულ შეწყვეტას მთელ მსოფლიოში 15 წლის განმავლობაში შეუძლია შეამციროს ნახშირორჟანგის გლობალური გამოყოფა 68%-ით და გადაარჩინოს დედამიწა გლობალური დათბობისგან.
