ახალი სამხედრო დახმარების პაკეტის ფარგლებში, შეერთებული შტატები უკრაინას რამდენიმე ასეულ ჯავშანმანქანას, დრონებსა და Javelin-ის ტიპის რაკეტებს გადასცემს. გარდა ამისა, დაგეგმილია 10-ზე მეტი Mi-17 ვერტმფრენისა და 18 ჰაუბიცის მიწოდება.
ამის შესახებ ინფორმაციას RBC-Ukraine პენტაგონის პრესმდივნის, ჯონ კირბის ბრიფინგზე დაყრდნობით ავრცელებს.
მისი თქმით, უკრაინისთვის 800 მილიონი დოლარის დახმარების პაკეტის ფარგლებში იარაღის მიწოდება დაუყოვნებლივ დაიწყება. უკრაინელი სამხედროები მიიღებენ:
200 M113 ჯავშანტრანსპორტიორი;
11 Mi-17 ვერტმფრენი;
18 ჰაუბიცა და 40 000 ჭურვი;
300 Switchblade-ის კამიკაძე დრონი;
500 რაკეტა Javelin-ის ტანკსაწინააღმდეგო სისტემებისთვის.
კირბიმ დასძინა, რომ ჯერ კიდევ გასარკვევია, თუ როგორ გაიგზავნება ახალი დახმარების პაკეტიდან ამერიკული ვერტმფრენები უკრაინაში. ისინი, სავარაუდოდ, რეგიონში გადაიგზავნება და შემდეგ, შესაძლოა, სატვირთო მანქანებით გადაიტანონ. თუმცა, პენტაგონის წარმომადგენელმა აღნიშნა, რომ ამერიკელი პილოტები მათ უკრაინის ტერიტორიაზე არ გაფრენენ.
შეგახსენებთ, რომ აშშ-ის პრეზიდენტმა ჯო ბაიდენმა ახალი სამხედრო დახმარების პაკეტი უკრაინელ კოლეგას, ვოლოდიმირ ზელენსკის, ტელეფონით საუბრისას გააცნო.
აღსანიშნავია, რომ ევროკავშირმა დღეს დაამტკიცა უკრაინისთვის სამხედრო ტექნიკის შესაძენად 500 მილიონი ევროს გამოყოფა.
