მან აღნიშნა, რომ რუსი სამხედრო მოსამსახურეების იქ ყოფნა არღვევს მისი ქვეყნის ნეიტრალურ სტატუსს.
მოლდოვას პრეზიდენტმა მაია სანდუმ ევროპარლამენტში სიტყვით გამოსვლისას მოითხოვა რუსული ჯარების გაყვანა დნესტრისპირეთიდან.
point.md-ის ცნობით, მოლდოვას პრეზიდენტმა ხაზგასმით აღნიშნა, რომ ამჟამად არ არსებობს ქვეყნის უკრაინაში ომში ჩათრევის უშუალო საფრთხე. სანდუმ ასევე გაიმეორა, რომ მოლდოვა ნეიტრალური ქვეყანაა.
„თუმცა, ჭეშმარიტად ნეიტრალური რომ ვიყოთ, რუსული ჯარები ჩვენი ტერიტორიიდან უნდა გავიდნენ. რადგან მათი ყოფნა ფუნდამენტურად არღვევს ჩვენს ნეიტრალურ სტატუსს და დამოუკიდებლობას“, - თქვა სანდუმ.
მისი თქმით, დნესტრისპირეთის კონფლიქტი მოლდოვას წინაშე მდგარი მრავალი გამოწვევიდან ერთ-ერთია.
მან აღნიშნა, რომ ხელისუფლება ვალდებულია, ეს საკითხი მშვიდობიანად მოაგვაროს მოლდოვას სუვერენიტეტისა და ტერიტორიული მთლიანობის შენარჩუნებით. „ჩვენ არ გვინდა ომი ან დესტაბილიზაცია“, - თქვა სანდუმ.
მან ასევე აღნიშნა, რომ რუსეთმა მეზობელ სახელმწიფოს თავს დაესხა, როგორც ეს წარსულშიც მომხდარა და „უკრაინის ხალხი და მთელი ევროპის კონტინენტი უსაზღვრო ტრაგედიაში ჩააგდო“. „მათ სურდათ უკრაინის ისეთ რამედ გადაქცევა, როგორადაც არავის სურდა გამხდარიყო - უფრო ძლიერი მეზობლის გეოპოლიტიკურ დანართად. ყველას გვინდოდა და ველოდით, რომ ეს დრო აღარასდროს დაბრუნდებოდა. მაგრამ ისინი დაბრუნდნენ“, - განაცხადა სანდუმ.
სანდუმ ასევე ხაზგასმით აღნიშნა, რომ მოლდოვა მხარს უჭერს უკრაინის სუვერენიტეტსა და ტერიტორიულ მთლიანობას: „ყირიმი უკრაინაა, დონბასი უკრაინაა, კიევი უკრაინაა და ყოველთვის უკრაინა იქნება“.
რუსი სამხედროები დნესტრისპირეთში
დნესტრისპირეთში არის რუსული ჯარების ოპერატიული ჯგუფი (OGRV), მე-14 კომბინირებული შეიარაღების არმიის მემკვიდრე, რომელიც სსრკ-ს დაშლის შემდეგ რუსეთის იურისდიქციის ქვეშ მოექცა.
მოლდოვას ხელისუფლებამ არაერთხელ მოითხოვა დნესტრისპირეთიდან რუსული ჯარების გაყვანა და მოლდოვას პარლამენტი მათ ყოფნას ქვეყნის ეროვნული უსაფრთხოებისთვის ერთ-ერთ მთავარ საფრთხედ მიიჩნევს.
2018 წლის ივნისში გაეროს გენერალურმა ასამბლეამ მიიღო რეზოლუცია, რომლითაც რუსეთს მოუწოდებდა დნესტრისპირეთიდან ჯარების გაყვანისაკენ, თუმცა რუსეთმა რეზოლუციას „პროპაგანდისტული ხრიკი“ უწოდა და განაცხადა, რომ მის განხორციელებას არ აპირებდა.
მოლდოვას ყოფილი პრეზიდენტი იგორ დოდონი კატეგორიულად ეწინააღმდეგებოდა რუსული ჯარების გაყვანას. დღეს მოლდოვას მთავრობის ყველა შტო მოითხოვს ქვეყანაში განლაგებული რუსული ჯარების დაუყოვნებლივ გაყვანას.
