დიაგნოზირებული კიბოს შემთხვევების რაოდენობა 50 წლამდე ასაკის 100 000 ადამიანზე 107.8-მდე გაიზარდა. ეს მაჩვენებელი 12.8%-ით მეტია 20 წლის წინანდელ მაჩვენებელთან შედარებით, იტყობინება The Wall Street Journal, რომელიც სამეცნიერო ჟურნალ BMJ Oncology-ში გამოქვეყნებულ კვლევას ეყრდნობა.
„სავარაუდოა, რომ გარემოსდაცვითი ცვლილებები, ჩვენი კვების რაციონის ცვლილებები, მედიკამენტების ცვლილებები ან რაიმე ისეთი, რაც ჯერ არ გამოგვივლენია, გავლენას ახდენს“, - განაცხადა ანდრეა ჩერჩეკმა, მემორიალ სლოუნ კეტერინგის კიბოს ცენტრის წარმომადგენელმა.
სხვა მკვლევარებმა, რომლებიც BMJ Oncology-ში წერენ, დაადასტურეს, რომ ახალგაზრდებში კიბოს დიაგნოზის დასმის რიცხვი სტაბილურად იზრდება. ამ ტენდენციის მიზეზები ჯერ კიდევ უცნობია. თუმცა, მეცნიერებმა დაადგინეს, რომ, მაგალითად, მოზარდობის ასაკში გაზიანი სასმელების დალევა, უმოძრაო ცხოვრების წესი და საკეისრო კვეთა ზრდის დაავადების განვითარების რისკს.
მეცნიერებმა ასევე აღნიშნეს კიბოს განვითარების გაზრდილი რისკი გარკვეული ანტიბიოტიკების, ანტიდეპრესანტების მიღების ან იშვიათი ინფექციების განვითარების შემდეგ. WSJ-ის ცნობით, 50 წლამდე ასაკის ადამიანებში კიბოს ყველაზე მაღალი მაჩვენებელი ჩრდილოეთ ამერიკაში, დასავლეთ ევროპასა და ავსტრალიაშია.
