რუსეთის ყოფილმა პრეზიდენტმა და უშიშროების საბჭოს ამჟამინდელმა მოადგილემ, დიმიტრი მედვედევმა, რუსულ მედიას ინტერვიუ მისცა, რომელშიც კვლავ დაემუქრა დასავლეთს, განიხილა უკრაინაში ომი და გააკრიტიკა სისხლის სამართლის საერთაშორისო სასამართლო, რომელმაც ცოტა ხნის წინ გასცა რუსეთის პრეზიდენტის, ვლადიმერ პუტინის დაპატიმრების ორდერი.
ინტერვიუს მოკლე შინაარსი მოამზადა პორტალმა Meduza.
უკრაინაზე საუბრისას მედვედევმა განაცხადა, რომ უკრაინა რუსეთის ნაწილია.
„გულწრფელად რომ ვთქვათ, უკრაინა რუსეთის ნაწილია, მაგრამ ჩვენ დიდი ხნის განმავლობაში სხვადასხვა ბინებში ვცხოვრობდით. დასავლეთს არ სჯეროდა რუსეთის მტკიცე გადაწყვეტილების, გაეკეთებინა ის, რაც ჩვენ გავაკეთეთ და მათ არასწორად გათვალეს. არიან ქვეყნები, რომლებთანაც მოლაპარაკებას აზრი არ აქვს - ისინი მხოლოდ ძალის ენას ესმით“, - თქვა მედვედევმა.
მან რუსეთის შეჭრა უკრაინაში იმით გაამართლა, რომ უკრაინას ნატოში გაწევრიანება და ბირთვული იარაღის მოპოვება სურდა.
მან ასევე კიდევ ერთხელ დაადანაშაულა დასავლეთი რუსეთის გახლეჩვის მცდელობაში.
მედვედევმა ახალი მუქარა და შეურაცხყოფა მიაყენა საერთაშორისო სისხლის სამართლის სასამართლოს და იმ ქვეყნებს, რომლებიც პუტინის დაკავებას სასამართლოს მიერ გაცემული დაპატიმრების ორდერის საფუძველზე განიხილავენ.
მედვედევმა საერთაშორისო სისხლის სამართლის სასამართლოს საერთაშორისო-სამართლებრივი უძლური უწოდა.
მან განსაკუთრებული ყურადღება დაუთმო გერმანიას.
„გერმანიაში ზოგიერთი იდიოტი ამბობს, რომ თუ პუტინი მოვა, მას დააპატიმრებენ. ეს რუსეთისთვის ომის გამოცხადება იქნებოდა და ამ შემთხვევაში, მთელი რუსული სახსრები ბუნდესტაგში წავიდოდა“, - თქვა მედვედევმა.
