ბელარუსის დიქტატორმა ალექსანდრე ლუკაშენკომ არმიის ლიდერებს უკრაინის საზღვართან „დაუყოვნებლივ“ სამხრეთ ოპერატიული სარდლობის შექმნა უბრძანა, იტყობინება ბელარუსის პროპაგანდისტული გამოცემა „ბელტა“.
სამხრეთის სარდლობის შექმნა ბელორუსის თავდაცვის სამინისტროში გამართულ შეხვედრაზე განიხილეს.
„სამწუხაროდ, გაიხსნა ახალი მიმართულება, როგორც ჩვენ ვამბობთ, ახალი ფრონტი და ჩვენ არ შეგვიძლია არ მივაქციოთ ყურადღება მას“, - განაცხადა ლუკაშენკომ.
მისი თქმით, ბელარუსის თავდაცვის მინისტრმა გასულ წელს სამხრეთის სარდლობის შექმნა შესთავაზა.
„მაშინ მივხვდით, რომ რაღაც უნდა გაგვეკეთებინა, მაგრამ დრო იმდენად დინამიურად და სწრაფად მოძრაობდა, რომ დაუყოვნებლივ დაგვჭირდა ამ ოპერატიული მიმართულების შექმნა. დასავლეთ და ჩრდილო-დასავლეთ ფრთებთან ერთად, სამხრეთის ფრთაც იარსებებს“, - თქვა დიქტატორმა.
მიუხედავად იმისა, რომ სარდლობა ჯერ არ შექმნილა, ლუკაშენკოს ბრძანებით, ბელორუსის ბატალიონის ტაქტიკური ჯგუფები უკვე კონცენტრირებულნი არიან სამხრეთ ფლანგზე.
„ჩვენ ეს როტაცია უნდა განვახორციელოთ, ეს ჩემი მკაცრი მოთხოვნაა და გამოვიყენოთ ის ჩვენი სამხედრო ძალების შესამოწმებლად. ეს საომარი მდგომარეობაა. მაგრამ ახლა ომი არ არის... ჩვენ ასევე უნდა ვივარჯიშოთ დაგეგმვაში ამ პირობებში: თუ, ღმერთმა დაიფაროს, ომი იქნება, როგორ ვიმოქმედებთ?“ - თქვა დიქტატორმა.
