ლატვიის ელექტრონული მასმედიის ეროვნულმა საბჭომ აკრძალა რუსეთში რეგისტრირებული 80 სატელევიზიო არხის მაუწყებლობა, რომლებიც მაყურებლისთვის ხელმისაწვდომი დარჩა, იუწყება Meduza Delfi-ზე დაყრდნობით.
გადაწყვეტილება მიღებული იქნა კანონის საფუძველზე, რომლის თანახმადაც, ლატვიაში არ შეიძლება გავრცელდეს პროგრამები, რომლებიც საფრთხეს უქმნის სხვა ქვეყნის ტერიტორიულ მთლიანობასა და დამოუკიდებლობას.
ამავდროულად, ელექტრონული მასმედიის ეროვნულმა საბჭომ მაუწყებლობის ლიცენზია მისცა ტელეარხ „დოჟდს“, რომელმაც უკრაინაში ომის დაწყების შემდეგ რუსეთში ოპერირება შეაჩერა. საბჭოს თავმჯდომარის, ივარს აბოლინშის თქმით, „დოჟდი“ რიგადან მაუწყებლობას განახორციელებს და 9 ივნისიდან ლატვიაში რეგისტრირებული მედიასაშუალებების სიაში შევა.
ლატვიამ ადრე აკრძალა რუსეთის სახელმწიფო ტელევიზიების მაუწყებლობა ქვეყანაში რუსეთის მიერ უკრაინაში შეჭრის საპასუხოდ.
რუსეთსა და უკრაინას შორის ომის დაწყების შემდეგ, რუსეთის გენერალურმა პროკურატურამ დაბლოკა ტელეარხ „დოჟდზე“ წვდომა. შემდგომში მან მაუწყებლობა შეაჩერა. „დოჟდის“ წამყვანმა ჟურნალისტებმა ქვეყანა დატოვეს და საკუთარი YouTube არხები გახსნეს.
