რუსეთის პრეზიდენტის, ვლადიმერ პუტინის ადმინისტრაციამ სახელმწიფო და პროსამთავრობო მედიასაშუალებებისთვის მოამზადა სახელმძღვანელო, რომელიც განმარტავს, თუ როგორ უნდა შეაჯამონ ზუსტად 2022 წლის მოვლენები რუსეთსა და მთელ მსოფლიოში, იუწყება დამოუკიდებელი რუსული მედიასაშუალება „მედუზა“.
სახელმძღვანელოს ავტორები „რეკომენდაციას უწევენ“, რომ მედიამ კიდევ ერთხელ გაუსვას ხაზი იმ ფაქტს, რომ ვლადიმერ პუტინმა უკრაინაში ჯარების გაგზავნით „მიიღო ერთადერთი სწორი გადაწყვეტილება, რამაც თავიდან აიცილა უკრაინისა და ნატოს მიერ რუსეთის ტერიტორიაზე მოსალოდნელი თავდასხმა“.
დოკუმენტში ასევე ნათქვამია, რომ დასავლეთის ქვეყნები 2014 წლიდან ემზადებიან რუსეთზე თავდასხმისთვის და სურთ „რუსი ხალხის გაყოფა და დაპყრობა“ (სწორედ 2014 წელს მოახდინა რუსეთმა ყირიმის ანექსია და დონბასში ომი დაიწყო).
დოკუმენტში აღნიშნულია, რომ „პუტინი ევროპას აძლევს შანსს, გონს მოეგოს და დაიბრუნოს თავისი სუვერენიტეტი და მომავალი“. ამჟამად, ევროპული ქვეყნები აშშ-ის „ვასალები“ და „პერიფერიები“ არიან. ნათქვამია, რომ მათი მომავალი მხოლოდ „რუსეთთან მჭიდრო თანამშრომლობითაა“ შესაძლებელი.
