რუსეთის პრეზიდენტის პრესმდივანმა დიმიტრი პესკოვმა ბრიფინგზე განაცხადა, რომ „რეფერენდუმების“ შემდეგ, უკრაინის მიერ დონბასის და სხვა ტერიტორიების დაბრუნების მცდელობებს რუსეთი „საკუთარ მიწებზე თავდასხმად“ მიიჩნევს.
„აბსოლუტურად. რუსეთის ფედერაციის კონსტიტუცია, რომელიც ამ საკითხთან დაკავშირებით ყველაფერს ძალიან ნათლად განსაზღვრავს, ამ ტერიტორიებზე დაუყოვნებლივ ამოქმედდება“, - უპასუხა პესკოვმა „ინტერფაქსის“ ცნობით.
მისი თქმით, რუსეთის კონსტიტუციის შესაბამისი დებულებები ძალაში შევა იმ მომენტიდან, როდესაც „რესპუბლიკები“ რუსეთს შეუერთდებიან.
„ამისთვის, რა თქმა უნდა, საჭირო იქნება როგორც ჩვენი პარლამენტის, ასევე პრეზიდენტის კონკრეტული გადაწყვეტილება, საჭირო დოკუმენტების ხელმოწერა და პროცედურების მთელი რიგი. ყველაფერი განხორციელდება მოქმედი კანონმდებლობის მკაცრი დაცვით“, - განაცხადა პესკოვმა.
მან განაცხადა, რომ თუ „რეფერენდუმის“ შედეგები დადებითი იქნება, მოსკოვს შეუძლია „საკმაოდ სწრაფად“ აღიაროს ახალი ტერიტორიული ერთეულები.
20 სექტემბერს, თვითგამოცხადებული „ლპრ“-ისა და „დპრ“-ის ხელმძღვანელებმა, ასევე ხერსონისა და ზაპოროჟიეს ოლქების რუსეთის მიერ დანიშნულმა ხელისუფლებამ, გამოაცხადეს რუსეთთან შეერთების შესახებ რეფერენდუმის ჩატარების გადაწყვეტილება. ხმის მიცემა 23-დან 27 სექტემბრამდე გაიმართება.
რუსეთის ფედერაციაში რეფერენდუმის საარჩევნო უბნებს ცენტრალური საარჩევნო კომისია (ცესკო) აწყობს.
უკრაინამ, ევროკავშირმა და აშშ-მ განაცხადეს, რომ არ ცნობენ „რეფერენდუმების“ და შემდგომი ანექსიის შედეგებს.
