რუსეთის პრეზიდენტის პრესმდივანმა დიმიტრი პესკოვმა განაცხადა, რომ სახელმწიფოს მეთაური მოქალაქეებისგან უკუკავშირს განსხვავებული ფორმით მიიღებს.
რუსეთის პრეზიდენტ ვლადიმერ პუტინთან ტრადიციული პირდაპირი ხაზი წელს არ შედგება. ეს ინფორმაცია ჟურნალისტებს პრეზიდენტის პრესმდივანმა, დიმიტრი პესკოვმა დაუდასტურა. თუმცა, კრემლის წარმომადგენლის თქმით, ეს დანაკარგი ანაზღაურდება.
„ხედავთ, რამდენად ხშირად ურთიერთობს პრეზიდენტი რეგიონულ ლიდერებთან და სხვადასხვა გუნდებთან. და ეს ყველაფერი, არსებითად, პირდაპირი ხაზის ფორმატით ხორციელდება. სამართლიანი იქნება თუ ვიტყვით, რომ პრეზიდენტი ამ პირდაპირ ხაზებს ბოლო რამდენიმე თვის განმავლობაში მართავს. რაც შეეხება პრეზიდენტის შესაძლებლობას, მიიღოს უკუკავშირი სხვადასხვა რეგიონის მოსახლეობისგან, ჩვენ შევეცდებით, პირდაპირი ხაზის ელემენტები, კითხვების შეგროვების თვალსაზრისით, პრეზიდენტის ყოველწლიურ პრესკონფერენციაში ჩავრთოთ“, - განმარტა პრესმდივანმა.
ქვეყნის ლიდერის მთავარი პრესკონფერენცია, წინა წლების მსგავსად, დეკემბერში გაიმართება. „პირდაპირი ხაზი ვლადიმერ პუტინთან“ პირველად 2001 წელს გავიდა ეთერში. 2013 წლის ტრანსლაცია ყველაზე ხანგრძლივი იყო, თითქმის ხუთი საათი გაგრძელდა.
