ბელგიის პრემიერ-მინისტრმა ალექსანდრ დე კროომ განაცხადა, რომ ევროპამ უკრაინაში რუსეთის შეჭრის გათვალისწინებით საკუთარი თავდაცვის ინდუსტრია უნდა გააძლიეროს.
როგორც „ევროპული პრავდა“ წერს, ამის შესახებ „პოლიტიკო“ იუწყება.
ევროპამ 24 თებერვლის შემდგომი რეალობისადმი რეაგირების შესახებ წარმოთქმულ სიტყვაში კროომ ენერგეტიკული დამოუკიდებლობის მნიშვნელობა და გაფართოებისადმი მიდგომის შეცვლა ახსენა, თუმცა ასევე აღნიშნა, რომ ევროკავშირმა საკუთარ თავდაცვის ინდუსტრიაში ინვესტირება უნდა განახორციელოს.
„ჩვენ უნდა შევქმნათ უფრო ძლიერი ევროპული თავდაცვის ინდუსტრია, რომელიც შეძლებს კონკურენცია გაუწიოს სხვა გლობალურ მოთამაშეებს. თუ ჩვენ გავზრდით ჩვენს თავდაცვის ბიუჯეტებს და ინვესტიციებს სამხედრო ტექნოლოგიებში, დაე, ეს იყოს ევროპული ტექნოლოგია, შემუშავებული და დანერგილი ევროპაში“, - აღნიშნა მან.
მისი თქმით, ეს ევროკავშირს ძლიერ სამხედრო ბლოკად და ნატოს ძლიერ ნაწილად აქცევდა, შეერთებულ შტატებთან ერთად. „ჩვენ არ უნდა ვიყოთ დამოკიდებულნი იმაზე, თუ ვინ იქნება შემდეგი თეთრ სახლში“, - აღნიშნა ალექსანდრ დე კროომ.
მან ასევე მოუწოდა ევროპული თავდაცვის ინდუსტრიის კომპანიებს შორის უფრო მეტი კოორდინაციისკენ. „მაგალითად, აშშ-ს ოთხი ტიპის საბრძოლო ხომალდი ჰყავს, ხოლო ევროპას - 30. იგივე ეხება ტანკებსა და თვითმფრინავებს. ეს ფრაგმენტაცია ასუსტებს ჩვენს თავდაცვის ბიუჯეტებს და ეს უნდა შეიცვალოს“, - აღნიშნა ბელგიის პრემიერ-მინისტრმა.
გარდა ამისა, იგი მიიჩნევს, რომ ევროკავშირისა და ნატოს წევრ ქვეყნებს შორის პარტნიორობა უნდა გაფართოვდეს და ამის მაგალითად დანიისა და ბელგიის საზღვაო და საჰაერო ძალების ინტეგრაცია მოჰყავს.
ბოლო წლებში ევროკომისიამ ხელი შეუწყო ინდუსტრიულ ალიანსებს სტრატეგიულად მნიშვნელოვანი პროდუქტების, მაგალითად, ნახევარგამტარული ელემენტების წარმოებისთვის. იგივე მიდგომა შეიძლება გამოყენებულ იქნას სამხედრო პროდუქტებზეც.
„უკრაინის ომმა ჩვენ, ევროპელები, ისტორიულ გზაჯვარედინზე დაგვაყენა. ჩვენ მარტივი არჩევანის წინაშე ვდგავართ: ან ძველ მიდგომებს, ძველ სტრუქტურებს მივყვებით და ევროპა დაიშლება, ან ევროპას განვაახლებთ, ბლოკის სახით უფრო ძლიერები და გამძლეები გავხდებით“, - დასძინა ალექსანდრე დე კრუიმ.
