გერმანიის მთავრობამ კანადისგან დადებითი პასუხი მიიღო მის მოთხოვნაზე, რომელიც ეხებოდა რუსული „გაზპრომის“ „ჩრდილოეთის ნაკადი 1“-ის გაზსადენ „სიმენსის“ ტურბინის მიწოდების განბლოკვას.
ამის შესახებ ინფორმაციას „ევროპული პრავდა“ „როიტერზე“ დაყრდნობით ავრცელებს.
გერმანიის მთავრობის წყარომ საინფორმაციო სააგენტოს დაუდასტურა, რომ კანადამ უკვე მიიღო გადაწყვეტილება ტურბინის დაბრუნების შესახებ. ის გერმანიას გადაეცემა, რომელიც შემდეგ მას „გაზპრომს“ გადასცემს, რათა ოტავამ საკუთარი სანქციები არ დაარღვიოს.
კრემლმა ტურბინის შესაძლო დაბრუნების კომენტირებისას პირდაპირ განაცხადა, რომ ეს გაზის მიწოდებას გაზრდიდა გერმანიაში, რომელმაც ცოტა ხნის წინ აღიარა, რომ დროულად ვერ შეავსო მიწისქვეშა საცავები.
როგორც „ევროპული პრავდა“ იტყობინება, კანადის მთავრობა აპირებს გერმანიასთან კონსულტაციით დაამტკიცოს გადაწყვეტილება „ჩრდილოეთის ნაკადის“ გაზსადენის ტურბინების მიწოდების სანქციების რეჟიმიდან გათავისუფლების შესახებ, რაც შექმნის პრეცედენტს აგრესორი სახელმწიფოს მოთხოვნით ემბარგოს მიზანმიმართული მოხსნისთვის.
უკრაინის მთავრობამ უკვე იცის კანადის განზრახვის შესახებ, დათანხმდეს რუსეთის წინააღმდეგ სანქციების შეზღუდვების ასეთ მიზანმიმართულ მოხსნას და ამ გადაწყვეტილებას „გაუმართლებელ და სანქციების რეჟიმისთვის საშიშად“ მიიჩნევს.
როგორც ივნისის შუა რიცხვებში გავრცელდა ინფორმაცია, რუსულმა კომპანია „გაზპრომმა“ განაცხადა, რომ 40%-ით ამცირებს ბუნებრივი აირის მიწოდებას „ჩრდილოეთის ნაკადი 1“-ის მილსადენით. რუსებმა ეს „Siemens-ის მიერ რემონტის დროულად ჩატარების უუნარობას“ მიაწერეს.
მოგვიანებით, რუსეთმა განაცხადა, რომ კანადაში „ჩრდილოეთის ნაკადის“ გაზსადენის ტურბინების შეკეთებასთან დაკავშირებულმა პრობლემებმა შესაძლოა პროექტის სრული შეჩერება და „გერმანიისთვის კატასტროფა“ გამოიწვიოს.
შედეგად, ივლისში გერმანიამ ოფიციალურად სთხოვა კანადას სანქციების მოხსნა და ტურბინის განბლოკვა, რომელმაც, სავარაუდოდ, „ჩრდილოეთის ნაკადის“ გაზის მიწოდება შეაჩერა.
