რუსეთის ფედერაციის ცენტრალურმა ბანკმა იუანისა და რუბლის გაცვლითი კურსი ბაზრის მონაწილეებისთვის საორიენტაციო ნიშნულად დაასახელა.
„იუანის/რუბლის გაცვლითი კურსი განსაზღვრავს სხვა სავალუტო წყვილების ტრაექტორიას და გახდება საორიენტაციო მაჩვენებელი ბაზრის მონაწილეებისთვის. მაისში მოსკოვის ბირჟაზე იუანის წილი 54%-ს შეადგენდა. ამრიგად, იუანი უკვე გახდა მთავარი ვალუტა სავალუტო ვაჭრობაში“, - ნათქვამია მარეგულირებლის განცხადებაში.
ბოლო ორი წლის განმავლობაში, დოლარისა და ევროს როლი რუსეთის ბაზარზე სტაბილურად შემცირდა. რუსეთის ფედერაციის ცენტრალური ბანკის მონაცემებით, ეს არის სავაჭრო ნაკადების აღმოსავლეთისკენ გადამისამართების და ანგარიშსწორების ვალუტის რუბლზე, იუანზე და მეგობარი ქვეყნების სხვა ვალუტებზე გადასვლის შედეგი.
„რაც შეეხება დოლარსა და ევროს, ისინი კვლავაც ივაჭრება ბირჟის გარეთ. მათი ბრუნვა OTC ბაზარზე დიდი ხანია აღემატება მოსკოვის ბირჟაზე ამ ვალუტებით განხორციელებული ტრანზაქციების მოცულობას. გარდა ამისა, OTC ბაზარზე ფუნქციონირებს ელექტრონული სავაჭრო პლატფორმები, სადაც ბანკებს ასევე შეუძლიათ ტრანზაქციების განხორციელება აშშ დოლარსა და ევროში“, - ნათქვამია განცხადებაში.
