იტალია 2024 წლისთვის რუსულ გაზზე სრულად უარს ამბობს.
ANSA-ს ცნობით, ამის შესახებ ეკოლოგიური გარდამავალი პერიოდის მინისტრმა, რობერტო ჩინგოლანიმ განაცხადა, წერს European Pravda.
„კონსერვაციული ზომებისა და ახალი მომწოდებლების დამატებით, 2024 წლის მეორე ნახევრიდან ჩვენ სრულიად დამოუკიდებლები ვიქნებით რუსეთიდან გაზის მომარაგებისგან“, - განაცხადა მინისტრმა.
მისი თქმით, უშუალო მიზანია 2022-2023 წლების ცივი სეზონის გადალახვა კონსერვაციისა და დივერსიფიკაციის ზომების განხორციელებით.
იტალიურმა კომპანია Eni-მ ოთხშაბათს „გაზპრომისგან“ გაფრთხილება მიიღო, რომ გაზის მოცულობა 27 მილიონ კუბურ მეტრამდე შემცირდებოდა, ბოლო დღეებში ეს მაჩვენებელი 34 მილიონი იყო.
შეგახსენებთ, რომ გერმანიამ დაადასტურა, რომ „ჩრდილოეთის ნაკადის“ მეშვეობით გაზის მიწოდება 20%-მდე შემცირდა.
მთავრობის წარმომადგენელმა განაცხადა, რომ რუსეთის მხრიდან ეს ძალის დემონსტრირებად იქნა აღქმული, მიუხედავად იმისა, რომ „გაზპრომი“ ტექნიკურ მიზეზებს ასახელებდა.
