CNBC-ის ცნობით, 2020 წლის მეორე კვარტალში იაპონურმა Nintendo-მ 144.7 მილიარდი იენის (1.4 მილიარდი დოლარი) მოგება დააფიქსირა, რაც ანალიტიკოსების მოლოდინს გადააჭარბა. შედარებისთვის, კომპანიის შემოსავალმა პირველ კვარტალში მხოლოდ 27.4 მილიარდი იენი (260,000 დოლარი) შეადგინა.
გამოცემა აღნიშნავს, რომ Nintendo-ს მოგების 428%-იანი ზრდა ასახავს, თუ რამდენად დიდი სარგებელი მოუტანა ვიდეო თამაშების ინდუსტრიამ პანდემიას. წმინდა გაყიდვებმა 358.1 მილიარდი იენი შეადგინა, რაც 108%-ით მეტია Nintendo-ს მიერ გასული წლის ანალოგიურ პერიოდში მიღებულ 172.1 მილიარდ იენთან შედარებით. პოპულარული Nintendo Switch და Switch Lite კონსოლების გაყიდვები დაახლოებით 167%-ით გაიზარდა და კვარტალში 5.68 მილიონ ერთეულს მიაღწია.
CNBC-ის ცნობით, ამ კვირაში Activision Blizzard-მა და Take-Two Interactive-მა მსგავსი შთამბეჭდავი შედეგები გამოაქვეყნეს.
ანალიტიკოსების თქმით, პანდემიამ Nintendo-ს მნიშვნელოვანი წინსვლის საშუალება მისცა. მათი თქმით, მარტში გამოსული ცხოვრების სიმულაციური თამაში Animal Crossing: New Horizons ჰიტად იქცა, რადგან ხალხმა ის იმ სახლებიდან თავის დაღწევის საშუალებად მიიჩნია, სადაც ისინი იყვნენ ჩაკეტილები.
დღეისათვის კომპანიამ ვიდეო თამაშის 22.4 მილიონი ეგზემპლარი გაყიდა, გაყიდული ერთეულების რაოდენობა წინა კვარტალთან შედარებით გაორმაგდა და 2018 წელს გამოსული Super Smash Bros. Ultimate-ის გაყიდვებს გადააჭარბა.
აგვისტოს დასაწყისში იაპონურმა კომპანია Sony-მ მეორე კვარტალში მოგების 1%-იანი კლების შესახებ განაცხადა, რამაც ანალიტიკოსები გააკვირვა. ამის მიუხედავად, თამაშების გაყიდვები წლიურად 82%-ით გაიზარდა და 91 მილიონ ეგზემპლარს მიაღწია.
