ესტონეთი გეგმავს, რომ მიმდინარე წლის იანვრის ბოლომდე შექმნას საკანონმდებლო ჩარჩო, რომელიც მას საშუალებას მისცემს, ტალინის მიერ გაყინული რუსული აქტივები უკრაინაში გადაიტანოს. ამის შესახებ ესტონეთის საგარეო საქმეთა სამინისტროს წარმომადგენელმა მიხკელ ტამმა განაცხადა, როგორც Bloomberg-ი ორშაბათს, 9 იანვარს იტყობინება.
ამგვარად, ესტონეთი შეიძლება გახდეს ევროკავშირის პირველი ქვეყანა, რომელიც რუსულ აქტივებს კიევს გადასცემს - სულ მცირე, არცერთ სხვა ქვეყანას არ გამოუცხადებია ასეთი მექანიზმის შექმნის შესახებ, ხაზს უსვამს Bloomberg.
მანამდე, იმავე სააგენტომ, გერმანიის მთავრობაში არსებულ წყაროებზე დაყრდნობით, გაავრცელა ინფორმაცია, რომ გერმანია, სადაც დაახლოებით 5 მილიარდი ევროა გაყინული, ასევე განიხილავს რუსული აქტივების უკრაინაში შესაძლო გადაცემას. თუმცა, ბერლინი ევროკავშირისგან კონსოლიდირებულ პოზიციას ელოდება და არ არის მზად გადადგას სარისკო, ცალმხრივი ნაბიჯები, რამაც შეიძლება სასამართლო პროცესების ტალღა გამოიწვიოს.
ესტონეთის მიერ გაყინული რუსული სახსრების საერთო ოდენობა 20 მილიონი აშშ დოლარია (19 მილიონი ევრო). საერთო ჯამში, ევროკავშირმა გაყინა 68 მილიარდი ევროს ოდენობის რუსული აქტივები, რომელთა 90 პროცენტი ბელგიას, ლუქსემბურგს, იტალიას, გერმანიას, ირლანდიას, ავსტრიასა და საფრანგეთს ეკუთვნის.
