გარდა ამისა, კავშირის საგარეო საქმეთა მინისტრები შეთანხმდნენ კიევისთვის 450 მილიონი ევროს ოდენობის დახმარების გაწევაზე.
ევროკავშირის ცალკეული წევრი სახელმწიფოები უკრაინას საბრძოლო თვითმფრინავებს მიაწვდიან.
როგორც UNIAN-ის კორესპონდენტი იტყობინება, ევროკომისიის ვიცე-პრეზიდენტმა და ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, ხოსეპ ბორელმა ეს განცხადება ევროკავშირის საბჭოს წევრი სახელმწიფოების საგარეო საქმეთა მინისტრების დონეზე ვიდეოკონფერენციის სხდომის შემდეგ გააკეთა.
„და რა თქმა უნდა, ჩვენ ვაპირებთ იარაღის, გამანადგურებლების მიწოდებას. ჩვენ საბრძოლო თვითმფრინავებსაც კი მივაწვდით. ჩვენ მხოლოდ საბრძოლო მასალაზე არ ვსაუბრობთ. ჩვენ უფრო მნიშვნელოვან იარაღს ვაძლევთ ომში გასაგზავნად“, - თქვა ბორელმა.
როგორც ევროკავშირის უმაღლესმა წარმომადგენელმა განაცხადა, უკრაინის საგარეო საქმეთა მინისტრმა დმიტრო კულებამ ევროკავშირს სთხოვა, რომ უკრაინას სჭირდება გამანადგურებლები და საბრძოლო თვითმფრინავები, რომელთა მართვაც უკრაინის არმიას შეუძლია. „ჩვენ ვიცით, რა ტიპის თვითმფრინავებია საუბარი და ზოგიერთ წევრ სახელმწიფოს ასეთი თვითმფრინავები ჰყავს“, - ხაზგასმით აღნიშნა ბორელმა.
მან დასძინა, რომ ეს დახმარება უკრაინას დასავლეთის საზღვრის გავლით მიეწოდება.
გარდა ამისა, ბორელის თქმით, ისინი ასევე შეთანხმდნენ კიევისთვის 450 მილიონი ევროს ოდენობის დახმარების შესახებ.
„ჩვენ გადავწყვიტეთ, უკრაინის არმიას 450 მილიონი ევროს ღირებულების სასიკვდილო იარაღი მივაწოდოთ“, - განაცხადა ბორელმა.
მისი თქმით, უკრაინას არალეტალური იარაღის, საწვავისა და დამცავი აღჭურვილობისთვის დამატებით 50 მილიონი ევრო გამოეყოფა.
