სევეროდონეცკთან ახლოს ფრანგი ჟურნალისტი ფრედერიკ ლეკლერ-იმოვი მოკლეს. 32 წლის ფოტოჟურნალისტი BFM არხისთვის დონბასში სამხედრო ოპერაციებს აშუქებდა. ეს მისი მეორე დავალება იყო უკრაინაში.
ემანუელ მაკრონმა თანამემამულის გარდაცვალება დაადასტურა. საფრანგეთის პრეზიდენტის თქმით, ჟურნალისტი ცხელ წერტილში მუშაობდა, რათა მსოფლიოსთვის „ომის რეალობა“ ეჩვენებინა. სახელმწიფოს მეთაურმა ასევე სამძიმარი გამოუცხადა გარდაცვლილის ოჯახს და კოლეგებს და მხარდაჭერის სიტყვები გაუგზავნა ყველას, ვინც ფრონტის ხაზზე კონფლიქტს აშუქებს.
მანამდე, ლუგანსკის ოლქის გუბერნატორმა სერგეი გაიდაიმ განაცხადა, რომ ჟურნალისტს ჭურვის ნამსხვრევისგან კისრის არეში სასიკვდილო ჭრილობა მიაყენეს და რუსეთი ლისიჩანსკისკენ მიმავალი ჯავშანტრანსპორტიორის დაბომბვაში დაადანაშაულა. ფრედერიკ ლეკლერ-იმოფი მშვიდობიანი მოსახლეობის ევაკუაციას იღებდა. კიდევ ერთი ფრანგი ჟურნალისტი, მაქსიმ ბრანდშტეტერი და ფრანგი შუამავალი, ოქსანა ლეუტა დაიჭრნენ. არასამთავრობო ორგანიზაცია „რეპორტიორები საზღვრებს გარეშე“-ს ცნობით, მათ სიცოცხლეს საფრთხე არ ემუქრება.
კიევში ვიზიტით მყოფმა საფრანგეთის საგარეო საქმეთა მინისტრმა ტრაგედიის გამჭვირვალე გამოძიება მოითხოვა. კატრინ კოლონამ „ორმაგ დანაშაულზე“ მიუთითა: ჟურნალისტის მკვლელობასა და ჰუმანიტარული კოლონის დაბომბვაზე.
ვოლოდიმირ ზელენსკიმ პირობა დადო, რომ ყველაფერს გააკეთებს, რათა გარდაცვლილი რეპორტიორის ცხედარი საფრანგეთში გადმოასვენონ.
უკრაინაში ომის დაწყებიდან სულ მცირე 8 ჟურნალისტი დაიღუპა.
