ბულგარეთის პრემიერ-მინისტრი კირილ პეტკოვი, რომლის მთავრობამაც ივნისში უნდობლობის ვოტუმი წააგო, ამაში რუსეთის გავლენასა და კორუფციას ადანაშაულებს.
პეტკოვმა ამის შესახებ The Times-თან ინტერვიუში ისაუბრა, წერს European Pravda.
„ჩვენ ვებრძოდით კორუფციას ადგილობრივ დონეზე, მაგრამ ვიპოვეთ უფრო დიდი მტერი - რუსული გავლენა. ჩვენ არ გვესმოდა, რომ კორუფცია და რუსული გავლენა ბულგარეთში ერთი და იგივეა. კორუფცია მოსკოვის საუკეთესო საგარეო პოლიტიკის ინსტრუმენტია ბალკანეთში“, - მიაჩნია ბულგარელ პოლიტიკოსს.
პეტკოვმა შეშფოთება გამოთქვა, რომ რუსეთმა შესაძლოა საბოლოოდ ჩამოაშოროს იგი პოლიტიკიდან მომავალ საპარლამენტო არჩევნებში, რომლებიც შემოდგომაზეა დაგეგმილი ახალი მთავრობის ფორმირების წარუმატებელი მცდელობის შემდეგ.
ბულგარეთის მთავრობის მეთაური მიიჩნევს, რომ რუსეთმა მის წინააღმდეგ აქტიური კამპანია აპრილში დაიწყო, როდესაც სოფიამ რუსული გაზის საფასურის რუბლით გადახდაზე უარი თქვა და ალტერნატიული წყაროები იპოვა - კერძოდ, აზერბაიჯანში.
„აზერბაიჯანული გაზი სამჯერ იაფი იყო, ვიდრე „გაზპრომის“, მაგრამ რატომღაც წინა მთავრობამ უარი თქვა მასზე. მათ თქვეს, რომ მილსადენი არ არსებობდა, მაგრამ აღმოჩნდა, რომ შემაერთებელი გვქონდა, რაც საკმარისი იყო. ვიღაც დათანხმდა სამჯერ მეტის გადახდას. ამის გასაკეთებლად წარმოუდგენლად სულელი ან კორუმპირებული უნდა იყო“, - მიაჩნია პეტკოვს.
მისი თქმით, გამოძიების დროს, ბულგარეთის წინა მთავრობის პოლიტიკური სტრატეგის ავტოფარეხში აღმოაჩინეს ახალი ჯიპი, რომლის შეძენაც რუსული სამშენებლო კომპანიის მიერ იყო დაფინანსებული.
პეტკოვმა ასევე კომენტარი გააკეთა ბულგარეთის გადაწყვეტილებაზე, ჯაშუშობის ბრალდებით რუსეთის საელჩოს 70 თანამშრომელი გააძევოს ქვეყნიდან.
„მე აბსოლუტურად დარწმუნებული ვარ, რომ ჩვენს მიერ გაძევებული 70 ადამიანიდან ზოგიერთი აქტიურად ურთიერთობდა ბულგარეთის პარლამენტის წევრებთან და ჟურნალისტებს არიგებდა გამოსაქვეყნებლად მზა სტატიებს. რუსეთის ელჩი ეჭვმიტანილი იყო ამაში აქტიურ როლში, რადგან ის პოლიტიკოსებს საბერძნეთში შვებულებაში მიჰყავდა. ეს არის სრული ჩარევა ქვეყნის შიდა საქმეებში“, - თქვა მან.
ბულგარეთსა და რუსეთს შორის დიპლომატიური დაძაბულობა მას შემდეგ გამწვავდა, რაც სოფიის მთავრობამ რუსეთის დიპლომატიური მისიის 70 თანამშრომლის გაძევების გადაწყვეტილება მიიღო. რუსი დიპლომატები და ოფიციალური პირები ივლისის დასაწყისში მოსკოვში გაემგზავრნენ.
ამის შემდეგ, სოფიაში რუსეთის ელჩმა, ელეონორა მიტროფანოვამ, ბულგარეთის ხელისუფლებას ულტიმატუმი წაუყენა, რათა შეეცვალათ გადაწყვეტილება, წინააღმდეგ შემთხვევაში, მან დაემუქრა, რომ რუსეთი ბულგარეთში თავის საელჩოს დახურავდა.
პრემიერ-მინისტრმა კირილ პეტკოვმა უარყო მიტროფანოვას მოთხოვნა და განაცხადა, რომ „ჩვენ არ დავუშვებთ უცხოელ დიპლომატებს ულტიმატუმების წაყენებას“. მიტროფანოვამ განაცხადა, რომ მოსკოვის ხელისუფლებას ბულგარეთში საელჩოს დახურვას სთხოვდა.
