რამდენიმე კომპანია უკვე გარკვეული ხანია მუშაობს Light Fidelity-ის, ანუ Li-Fi-ის ტექნოლოგიაზე, თუმცა ახლა ამერიკელმა ინჟინრებმა მისი სტანდარტიზაციისკენ მნიშვნელოვანი ნაბიჯი გადადგეს.
ამერიკის შეერთებულ შტატებში არაკომერციული საინჟინრო ასოციაციის, ელექტრო და ელექტრონიკის ინჟინრების ინსტიტუტის (IEEE) მიერ დამტკიცებული Li-Fi (Light Fidelity) უკაბელო საკომუნიკაციო სისტემა, რომელსაც 802.11bb ასახელებენ. მისი შემქმნელების თქმით, ის უფრო სწრაფი და უსაფრთხო იქნება, ვიდრე ტრადიციული უკაბელო საკომუნიკაციო მეთოდები, როგორიცაა Wi-Fi, IEEE 802.11 სტანდარტებზე დაფუძნებული მოწყობილობებისთვის განკუთვნილი უკაბელო ლოკალური ქსელის ტექნოლოგია. ამის შესახებ ონლაინ გამოცემა Tom's Hardware იტყობინება.
Li-Fi-სა და ნაცნობ Wi-Fi-ს შორის განსხვავება ისაა, რომ ეს უკაბელო საკომუნიკაციო ტექნოლოგია მონაცემების გადასაცემად რადიოტალღების ნაცვლად ხილული სინათლის დიაპაზონის ელექტრომაგნიტურ ტალღებს იყენებს.
ამგვარად, ინფორმაციის მატარებელი ჩვეულებრივი LED-ებიდან მიღებული სინათლეა, ხოლო მიმღებებს შეუძლიათ ფოტონების (ელემენტარული ნაწილაკების, ელექტრომაგნიტური გამოსხივების კვანტების) აღმოჩენა და მათგან ინფორმაციის ამოღება. მომხმარებლები ვერ შეამჩნევენ სინათლის ციმციმს, რადგან ის 60 ჰერცზე მეტ სიხშირეებზე ხდება, რომლებიც ადამიანის თვალისთვის მიუწვდომელია.
