ჩინეთში, შაბათს, ადგილობრივი დროით 00:00 საათის (პარასკევს, მოსკოვის დროით 19:00 საათის) მონაცემებით, ახალი ტიპის კორონავირუსით გამოწვეული პნევმონიით ინფიცირებულთა რაოდენობა 34 546-ს შეადგენდა, აქედან 24 953 დაავადების ეპიცენტრში, ჰუბეის პროვინციაში იმყოფებოდა, გარდაცვალების 722 შემთხვევა დაფიქსირდა, იტყობინება ჩინეთის ჯანდაცვის ეროვნული კომისია.
ბოლო 24 საათის განმავლობაში, ქვეყნის მასშტაბით ინფიცირებულთა რიცხვი 3,399-ით გაიზარდა, გარდაიცვალა 86 ადამიანი. 81 ადამიანი გარდაიცვალა ჰუბეიში, ორი ჰეილონძიანგის პროვინციაში, რომელიც რუსეთს ესაზღვრება, თითო-თითო ჰენანისა და განსუს პროვინციებში და ერთიც პეკინში.
ქვეყნის მასშტაბით საავადმყოფოებში ამჟამად 31 000-ზე მეტი ადამიანი გადის მკურნალობას, მათგან 6 100 პაციენტის მდგომარეობა მძიმეა. საეჭვო შემთხვევების გამო, ქვეყნის მასშტაბით სამედიცინო დაწესებულებებში თითქმის 190 000 ადამიანი მეთვალყურეობის ქვეშ იმყოფება, ხოლო 2 000-ზე მეტი გამოჯანმრთელდა და გაეწერა საავადმყოფოდან.
მატერიკის გარეთ, ჩინეთის ტერიტორიებზე ახალი პნევმონიის 52 შემთხვევა დადასტურდა: 26 ჰონგ-კონგში, ერთი ფატალური შედეგით, 10 მაკაოში და 16 ტაივანში.
