მოსკოვის კრასნოსელსკის მუნიციპალური ოლქის დეპუტატს, ილია იაშინს, ბრალი წაუყენეს „პოლიტიკური სიძულვილით მოტივირებული რუსული არმიის შესახებ ყალბი ინფორმაციის“ გავრცელებაში.
სისხლის სამართლის საქმის აღძვრა YouTube-ის გადაცემამ გამოიწვია, რომელშიც იაშინი ბუჩაში მომხდარ მასობრივ მკვლელობებზე საუბრობდა. BBC-ის ცნობით, პოლიტიკოსს ახლა ხუთიდან ათ წლამდე თავისუფლების აღკვეთა ემუქრება.
დაკითხვის დროს იაშინმა უარი თქვა ჩვენების მიცემაზე და თავისი პოზიცია „სისხლის სამართლის საქმის აშკარა პოლიტიკური მოტივაციით“ ახსნა.
მოსკოვის ბასმანიის სასამართლოში ასევე დაიწყო მოსმენა, სადაც გამომძიებლები პოლიტიკოსის წინასწარი პატიმრობის შეფარდებას მოითხოვენ.
ილია იაშინმა პოლიტიკური კარიერა სოციალ-დემოკრატიულ პარტია „იაბლოკოში“ დაიწყო. 2008 წელს ის შეუერთდა ლიბერალურ-დემოკრატიულ მოძრაობა „სოლიდარობას“, რომელიც ბორის ნემცოვმა და გარი კასპაროვმა დააარსეს. 2011 წლიდან 2013 წლამდე ის რუსეთში „თოვლის რევოლუციის“ ერთ-ერთი მონაწილე იყო. 2012 წელს ის შეუერთდა ოპოზიციის საკოორდინაციო საბჭოს. ჟურნალისტის რანგში ის თანამშრომლობდა „ნოვაია გაზეტაში“.
2022 წელს მან ღიად დაგმო რუსეთის შეჭრა უკრაინაში, თუმცა უარი თქვა ქვეყნის დატოვებაზე. მაისში იაშინის წინააღმდეგ ოთხი ადმინისტრაციული ბრალდება წაუყენეს რუსული არმიის „დისკრედიტაციის“ ბრალდებით.
