რუსეთში ომის საწინააღმდეგო საპროტესტო აქციების დროს დაახლოებით 3500 ადამიანი დააკავეს, იტყობინება შინაგან საქმეთა სამინისტრო.
ადამიანის უფლებათა დამცველი პროექტის, OVD-Info-ს მონაცემებით, რომელიც უცხო ქვეყნის აგენტად არის გამოცხადებული, კიდევ თითქმის ათასი ადამიანი დააკავეს. პოლიციამ გადაკეტა ქალაქის ცენტრალური მოედნები, სადაც დემონსტრანტები მიემართებოდნენ და მომიტინგეები ძალის გამოყენებით პოლიციის ფურგონებში შეათრია.
„რუსეთის შეიარაღებული ძალების გამოყენების დისკრედიტაციის“ შესახებ ახალი მუხლის თანახმად, მათ 50 000 რუბლამდე ადმინისტრაციული ჯარიმა ემუქრებათ. განმეორებითი დარღვევისთვის ჯარიმა 300 000 რუბლამდე იზრდება. მათ ასევე სამწლიანი თავისუფლების აღკვეთა ემუქრებათ.
მაგრამ ასეთი პერსპექტივების მიუხედავად, რუსეთის ორმოცდაათზე მეტ ქალაქში ათასობით ადამიანი მაინც გამოვიდა ქუჩებში სლოგანებითა და პლაკატებით წარწერით „არა ომს“.
რუსეთში ომის საწინააღმდეგო საპროტესტო აქციებთან ერთად, უკრაინაში „სამხედრო სპეცოპერაციის“ მხარდამჭერი ავტოკოლონაც გაიმართა. რუსეთის ქალაქების ქუჩებში, ეროვნული ჰიმნის ჰანგებზე, რუსული დროშებით, ასო „Z“-ით და ფანჯრებზე ამოტვიფრული სლოგანით „ჩვენ არ ვტოვებთ ჩვენსას“ მანქანების კოლონები მოძრაობდნენ. აქტივისტებმა მარადიულ ცეცხლთან ყვავილებიც დადეს და სამხედრო სიმღერები შეასრულეს. ზოგიერთ ქალაქში მანქანები „Z“-ის ასოს ფორმის იყო განლაგებული - უკრაინის სამხედრო ოპერაციის სიმბოლო - და ფლეშმობი დრონით გადაიღეს.
