გერმანული ავტომწარმოებელი „ფოლკსვაგენი“ ეძებს ინვესტორს, რომელიც კალუგაში მდებარე მისი რუსული ქარხნის შეძენას ისურვებდა.
ამის შესახებ ინფორმაციას RBC-Ukraine Frankfurter Allgemeine Zeitung-ზე დაყრდნობით ავრცელებს.
„ესკალაციის თითოეული ეტაპის შემდეგ, მცირდება იმის ალბათობა, რომ უახლოეს მომავალში იქ კვლავ შევძლებთ წარმოებას“, - განაცხადა კომპანიის ერთ-ერთმა მთავარმა მენეჯერმა, რომელმაც ანონიმურად დარჩენა ისურვა.
მისი თქმით, გერმანულ კონცერნს აშკარად აქვს სურვილი, სრულად დატოვოს რუსეთი. კომპანიის მენეჯმენტმა დაასკვნა, რომ ეს არის ერთადერთი ვარიანტი არსებულ სიტუაციაში.
„ფოლკსვაგენის“ ევროპულმა პრესსამსახურმა დაადასტურა, რომ ის რუსული ბიზნესის მომავლისთვის სხვადასხვა ვარიანტს განიხილავს, მათ შორის მესამე მხარეებისთვის გაყიდვას, თუმცა საბოლოო გადაწყვეტილება ჯერ არ არის მიღებული.
ადრე გავრცელდა ინფორმაცია, რომ შვედური კომპანია Volvo Group რუსეთში თავისი ბიზნესის სრულად ან ნაწილობრივ გაყიდვას გეგმავს.
შეგახსენებთ, რომ გუშინ ცნობილი გახდა, რომ ამერიკულმა ნავთობგიგანტმა Exxon Mobil-მა რუსეთი მთლიანად დატოვა მას შემდეგ, რაც რუსეთის მთავრობამ ცალმხრივად შეწყვიტა მონაწილეობა სახალინ-1 ნავთობისა და გაზის პროექტში.
