იაპონურმა ავტომწარმოებელმა Toyota Motor Corp.-მა გადაწყვიტა, შეაჩეროს ოპერაციები დიდ ბრიტანეთში მდებარე ორ ქარხანაში და საფრანგეთში მდებარე ერთ ქარხანაში კორონავირუსის ახალი ვარიანტის გავრცელების გამო.
ტელევიზია NHK-ის ცნობით, ამ საწარმოებში მუშები საშობაო არდადეგებზე ადრე გაგზავნიან.
ქარხნები ძირითადად ტრანსპორტირების პრობლემების გამო იკეტება, რაც სერიოზულად მოქმედებს მზა პროდუქციის გადაზიდვასა და ნაწილებისა და კომპონენტების მიწოდებაზე. კერძოდ, ლა-მანშის გვირაბში მატარებლებისა და მანქანების მოძრაობა შეჩერებულია. NHK-ის ცნობით, ამან მნიშვნელოვანი გავლენა მოახდინა Toyota Motor-ის ოპერაციებზე.
14 დეკემბერს, დიდი ბრიტანეთის ჯანდაცვის მინისტრმა, მეტ ჰენკოკმა, განაცხადა, რომ ქვეყანაში კორონავირუსის ახალი ვარიანტი აღმოაჩინეს. როგორც იტყობინებიან, ის ცნობილ შტამებზე სწრაფად ვრცელდება. 19 დეკემბერს გამართულ პრესკონფერენციაზე, დიდი ბრიტანეთის პრემიერ-მინისტრმა, ბორის ჯონსონმა, განაცხადა, რომ ახალი ვარიანტი შესაძლოა 70%-ით უფრო გადამდები იყოს. მან დასძინა, რომ ბრიტანელმა ექსპერტებმა ჯერ ვერ იპოვეს მტკიცებულება იმისა, რომ მუტირებული ვირუსი უფრო მეტად იწვევს სიკვდილს.
