ჩინურმა საძიებო გიგანტმა Baidu-მ დღეს ChatGPT-ის ეკვივალენტის, Ernie ბოტის გაშვების დაგეგმილი პირდაპირი ეთერი გააუქმა.
სამაგიეროდ, კომპანიამ პროდუქტის ტესტირების პირველ ჯგუფთან დახურული შეხვედრის ჩატარება ამჯობინა. Baidu-მ ფორმატის შეცვლის მიზეზად ბოტის ტესტირების მსურველი 120 000 ბიზნეს მომხმარებლისგან „მაღალი მოთხოვნა“ დაასახელა.
ერნი, ჩინეთის უახლოესი პასუხი აშშ-ში შემუშავებულ ChatGPT-ზე, 16 მარტს Baidu-ს აღმასრულებელმა დირექტორმა რობინ ლიმ წარადგინა. მან ასევე ჩაატარა პირდაპირი ტრანსლაცია, სადაც ჩინური ჩატბოტის სხვადასხვა შესაძლებლობების დემონსტრირება მოახდინა.
გაუქმების შესახებ განცხადების შემდეგ, Baidu-ს აქციები 4.5%-ით დაეცა.
შეგახსენებთ, რომ OpenAI-მ ცოტა ხნის წინ ChatGPT-ს ინტერნეტზე წვდომის უფლება მისცა სასარგებლო ინფორმაციის შესაგროვებლად. აქამდე სერვისი შემოიფარგლებოდა 2021 წელს შექმნილი ცოდნის ბაზით.