ასადი

„როიტერის“ ცნობით, სირიის დროებითი პრეზიდენტი, აჰმედ ალ-შარაა, წინა რეჟიმის დამხობის შემდეგ პირველად ჩავიდა მოსკოვში.

ის კრემლში ვლადიმერ პუტინმა მიიღო. რუსეთის ლიდერმა აღნიშნა ქვეყნებს შორის „განსაკუთრებული ურთიერთობა“ და ხაზი გაუსვა, რომ მოსკოვმა „ის არასდროს ააგო პოლიტიკურ მიზანშეწონილობაზე“.

პუტინმა განაცხადა, რომ სირია „რთულ პერიოდს“ გადის, თუმცა გამოთქვა რწმენა, რომ ბოლო საპარლამენტო არჩევნები ხელს შეუწყობს „ყველა პოლიტიკურ ძალას შორის თანამშრომლობის გაძლიერებას“. საპასუხოდ, ალ-შარაამ განაცხადა, რომ რუსეთი „მნიშვნელოვან როლს შეასრულებს ახალი სირიის განვითარებაში“, იტყობინება TASS.

თუმცა, „როიტერის“ ცნობით, სირიის ლიდერის ვიზიტს გაცილებით დაძაბული ფონი აქვს. სააგენტოს წყაროები აცხადებენ, რომ ალ-შარაა აპირებს ოფიციალურად მოსთხოვოს მოსკოვს ყოფილი პრეზიდენტის, ბაშარ ალ-ასადის ექსტრადიცია, რომელიც ამჟამად რუსეთში იმალება. გაქცეულ პოლიტიკოსს ბრალი ედება „სირიელების წინააღმდეგ ჩადენილ დანაშაულებში“.

წყარო ასევე იტყობინება, რომ დროებითი პრეზიდენტი აპირებს განიხილოს რუსული სამხედრო ბაზების ტარტუსსა და ხმეიმში შენარჩუნების საკითხი. რუსეთის საგარეო საქმეთა სამინისტროს პრესსპიკერის, მარია ზახაროვას თქმით, ასევე განიხილება ქვეყანაში არსებული „რუსული სამხედრო ობიექტების ფუნქციონირების შესაძლო რეფორმატირება“.

ასადის რეჟიმი 8 დეკემბერს დაამხეს, როდესაც შეიარაღებული ოპოზიციური ძალები დამასკოში შევიდნენ. ალ-შარაა, ერთ-ერთი ფრაქციის ყოფილი წევრი, გარდამავალი პრეზიდენტი გახდა. თავად ასადი, გერმანული გაზეთის, „დი ცაიტის“ , მოსკოვში ცხოვრობს, სადაც დროს ონლაინ თამაშებში ატარებს.

პუტინისა და ალ-შარაას მოლაპარაკებები დახურულ კარს მიღმა მიმდინარეობს და შეხვედრის შედეგი შეიძლება გადამწყვეტი იყოს რუსეთ-სირიის ურთიერთობების მომავლისა და თავად ასადის ბედისწერისთვის.