ფინეთის მთავრობამ გადაწყვიტა, რუსეთთან სასაზღვრო გადაკვეთაზე დაწესებული შეზღუდვები კიდევ ორი თვით, 14 აპრილამდე გაახანგრძლივოს.
„რუსეთის ხელისუფლებასთან მოლაპარაკებების შედეგად ჯერ ვერანაირი გადაწყვეტა ვერ იქნა მიღწეული. რუსული მხარე სიფრთხილით ეკიდება სასაზღვრო დაცვის წარმომადგენლებთან მოლაპარაკებების დაწყებას და ამ ფენომენის მართვასთან დაკავშირებულ წინადადებებს. ფინურმა მხარემ დანაშაულის პრევენციის სფეროში თანამშრომლობის განვითარება სცადა, თუმცა ამან (პრობლემის - IF) გადაწყვეტამდე არ მიგვიყვანა“, - განაცხადა ქვეყნის შინაგან საქმეთა სამინისტრომ.
ფინეთის საზოგადოებრივი მაუწყებლის, YLE-ს ცნობით, ფინეთსა და რუსეთს შორის სახმელეთო საზღვრის 14 აპრილამდე დაკეტვის შესახებ გადაწყვეტილება ფინეთის მთავრობის ხუთშაბათს გამართულ სხდომაზე მიიღეს.
გარდა ამისა, პორტალის ცნობით, ფინეთსა და რუსეთს შორის სახმელეთო სასაზღვრო გამშვებ პუნქტებზე საერთაშორისო დაცვის შესახებ განაცხადების წარდგენა შეუძლებელი იქნება.
„არსებობს საფუძველი ვივარაუდოთ, რომ ჩვენ გრძელვადიან სიტუაციასთან გვაქვს საქმე. რუსეთის სასაზღვრო ზონაში სულ მცირე ასობით და შესაძლოა ათასობით მიგრანტი იმყოფება, რომლებიც ფინეთში მოგზაურობის გაგრძელების შესაძლებლობას ელოდებიან“, - განუცხადა ფინეთის შინაგან საქმეთა მინისტრმა მარი რანტანენმა ხუთშაბათს ჟურნალისტებს.
მისი თქმით, „აღმოსავლეთ საზღვრის სრული დახურვის გაგრძელება გასაგებია, განსაკუთრებით ფინეთში მცხოვრები ადამიანებისთვის, რომლებსაც საზღვრის მეორე მხარეს ოჯახის წევრები ან სხვა ახლო ნათესავები ჰყავთ“. „თუმცა, გამშვები პუნქტების დროებითი დახურვა რუსეთის ქმედებების შედეგია, რაც ფინეთს აიძულებს, ეროვნული უსაფრთხოება ყველა სხვა საზრუნავზე მაღლა დააყენოს“, - განაცხადა მინისტრმა.
„ახლა, როდესაც საზღვრების დაკეტვას ორი თვით ვახანგრძლივებთ, გვსურს, ეს გამოვიყენოთ იმისთვის, რომ რუსეთს და მესამე ქვეყნების მოქალაქეებს სიგნალი გავუგზავნოთ, რომ ფინეთის საზღვარი ღია არ არის. ფინეთი ზეწოლას არ მოითმენს“, - განაცხადა რანტანენმა.
„შესაძლოა, სხვა ზომების განხილვაც იყოს საჭირო“, - დასძინა მან.
ფინეთის შინაგან საქმეთა სამინისტრომ განაცხადა, რომ ამჟამად სხვა სამინისტროებთან თანამშრომლობით „ალტერნატიულ ზომებს“ იკვლევს.
ნოემბერში ფინეთის მთავრობამ გადაწყვიტა აღმოსავლეთ საზღვარზე რვავე სამგზავრო გადასასვლელის დახურვა, რის მიზეზადაც რუსეთის მიერ ორგანიზებული მესამე ქვეყნებიდან ფინეთის საზღვარზე მიგრანტების მასობრივი შემოდინება დასახელდა.
როგორც იტყობინებიან, 14 დეკემბერს ორი სასაზღვრო გადასასვლელი გაიხსნა, თუმცა იმავე დღეს ფინეთის მთავრობამ ისინი „უსაფრთხოების მიზნით“ ერთი თვით კვლავ დახურა.
11 იანვარს ფინეთის მთავრობამ რუსეთთან საზღვრის გადაკვეთაზე დაწესებული შეზღუდვები კიდევ ერთი თვით გაახანგრძლივა.
