უკრაინაში ომის დაწყების შემდეგ რუსეთიდან თხევადი ბუნებრივი აირის ესპანეთში იმპორტი 84%-ით გაიზარდა.
ამის შესახებ ინფორმაციას RBC-Ukraine Bloomberg-ზე დაყრდნობით ავრცელებს.
ეს აჩვენებს, თუ რამდენად რჩება ევროპა დამოკიდებული რუსეთზე, ენერგეტიკული კავშირების შემცირების მცდელობების მიუხედავად.
ევროპული ქვეყანა იძულებული გახდა გაეზარდა სხვა ქვეყნებიდან თხევადი ბუნებრივი აირის შესყიდვები მას შემდეგ, რაც დიპლომატიური დაპირისპირების გამო დიდი ხნის გაზის მიმწოდებელი ალჟირიდან მიწოდება შეწყდა.
„მიუხედავად იმისა, რომ რუსეთმა ევროპაში მილსადენებით გაყიდვები ეტაპობრივად შეამცირა, თხევადი ბუნებრივი აირის ნაკადები ბოლო ერთი წლის განმავლობაში 30%-ზე მეტით გაიზარდა“, - ნათქვამია ანგარიშში.
წელს ევროკავშირში რუსული თხევადი ბუნებრივი აირის უმსხვილესი მყიდველი ესპანეთია, შემდეგ მოდიან ბელგია და საფრანგეთი. ესპანეთი რუსულ გაზს ექსკლუზიურად თხევადი ბუნებრივი აირის სახით იღებს, რადგან მის ენერგეტიკულ კომპანიას, Naturgy Energy Group SA-ს, არქტიკაში მდებარე Yamal LNG-დან საწვავის 2038 წლამდე შესყიდვის 20-წლიანი კონტრაქტი აქვს. 2022 წლის მარტიდან მიმდინარე წლის თებერვლამდე პერიოდის იმპორტი 61,344 გიგავატ/საათამდე გაიზარდა, წინა წლის ანალოგიურ პერიოდში კი ეს მაჩვენებელი 33,305 გიგავატ/საათს შეადგენდა.
ამ პერიოდში ესპანეთში მთლიანი მიწოდების 14% რუსული თხევადი ბუნებრივი აირით იყო მომარაგებული, რაც 6.2%-იან ზრდას წარმოადგენს. გასულ თვეში დასავლეთ ევროპაში საწვავის მთლიანი იმპორტის დაახლოებით 16% რუსულმა თხევადი ბუნებრივი აირით იყო მომარაგებული, თითქმის ნახევარი კი აშშ-მ მიაწოდა.
მანამდე, ენერგეტიკის საკითხებში ევროკომისარმა კადრი სიმსონმა მოუწოდა ევროკავშირის ქვეყნებსა და კომპანიებს, არ გააფორმონ ახალი კონტრაქტები რუსული თხევადი ბუნებრივი აირის შესაძენად.
როგორც RBC-Ukraine იტყობინება, გერმანიამ შექმნა თხევადი ბუნებრივი აირის რეზერვი იმ შემთხვევაში, თუ უკრაინის გავლით გაზის ტრანზიტი შეწყდება.