მსოფლიოში ერთ-ერთმა უდიდესმა კრიპტოვალუტის ბირჟამ, Binance-მა, თავისი პლატფორმა ყაზახეთში გაუშვა. ადგილობრივი ბირჟა ასტანას საერთაშორისო ფინანსურ ცენტრში ოპერირებს. მომხმარებლებს შეუძლიათ კრიპტოვალუტების ყიდვა, გაყიდვა, სპოტური ვაჭრობა და კონვერტაცია. თუმცა, ზოგიერთ პროდუქტს შეიძლება ჰქონდეს შეზღუდვები ადგილობრივი რეგულაციების გამო.
ამჟამად, მომხმარებლებს თანხის შეტანა და გატანა მხოლოდ ყაზახეთში გაცემული Mastercard ბარათებით შეუძლიათ. ამ ბარათების დეპოზიტის ლიმიტი 420,000 ტენგეა (დაახლოებით 940 აშშ დოლარი) თითო ტრანზაქციაზე. მომავალში ტრანზაქციები ასევე ხელმისაწვდომი იქნება Freedom Finance-ის საბანკო გადარიცხვებით.
მიუხედავად იმისა, რომ სხვა ქვეყნების მოქალაქეებს შეუძლიათ პლატფორმის გამოყენება, მათ ყაზახური Mastercard-ის გარდა, უნდა ჰქონდეთ ინდივიდუალური საიდენტიფიკაციო ნომერი (IIN), რომლის უფასოდ მიღებაც შესაძლებელია მიგრაციის ორგანოებისგან.
პლატფორმა თავდაპირველად ყაზახეთში კრიპტოვალუტისა და ტოკენის 21 სახეობას სთავაზობს მომხმარებელს, ხოლო Binance Kazakhstan-ის ხელმძღვანელის, ჟასლან მადიევის თქმით, 2023 წლის ბოლოსთვის ამ რაოდენობის 100-მდე გაზრდა იგეგმება.
შეგახსენებთ, რომ Binance-მა ადრე ნებაყოფლობით და ოფიციალურად დატოვა დიდი ბრიტანეთი. ბირჟამ ფინანსური ქცევის ორგანოს მიმართა შვილობილი კომპანიის, Binance Markets Limited-ის რეგისტრაციიდან მოხსნის მოთხოვნით.
