ევროპის კოსმოსური სააგენტოს (ESA) გენერალურმა დირექტორმა, იოზეფ აშბახერმა, Financial Times-ს (FT) განუცხადა, რომ მისი სააგენტო ამჟამად განიხილავს წინადადებებს კოსმოსური ხომალდის შესაქმნელად, რომელსაც ევროპელი ასტრონავტები მთვარეზე გაგზავნა შეეძლება.
ევროპის კოსმოსური სააგენტოს ხელმძღვანელის თქმით, ეს შესაძლოა მომდევნო ათწლეულში მოხდეს. ბატონი აშბახერი მიიჩნევს, რომ ევროპა მთვარეზე პილოტირებული მისიისთვის უნდა მოემზადოს, რათა გლობალურ კოსმოსურ რბოლაში შეერთებულ შტატებს, ჩინეთსა და ინდოეთს არ ჩამორჩეს.
„ის, რაც ამჟამად აშშ-ში, ჩინეთსა და ინდოეთში ხდება, საკმაოდ შთამბეჭდავია“, - აღნიშნა ESA-ს ხელმძღვანელმა. „მაგრამ თუ ევროპის სრულიად დამოუკიდებელ კოსმოსურ პროექტებს დააკვირდებით, დაინახავთ, რომ საქმე იმავე დონეზე არ არის. ასე რომ, აქ ბევრ ახალ შესაძლებლობას ვხედავ, თუმცა ამ შესაძლებლობებიდან ზოგიერთი უკვე ხელიდან გაშვებულია“.
მარტში, ევროპის კოსმოსური სააგენტოს (ESA) მიერ დანიშნულმა დამოუკიდებელი ექსპერტების ჯგუფმა მოამზადა ანგარიში, რომელშიც ნათქვამია, რომ 2030 წლისთვის უკვე გამოცხადებულია დაახლოებით 100 მთვარის მისია, როგორც სამთავრობო უწყებების, ასევე კერძო კომპანიების მიერ. ევროპის კოსმოსური სააგენტო მათგან მხოლოდ ორში თამაშობს წამყვან როლს.